Аб'яўлены першы ў свеце конкурс прыгажосці сярод штучных мадэляў. Пераможца атрымае амаль столькі ж, колькі і «Міс Беларусь»
Новы конкурс атрымаў назву «Міс ШІ» («Міс Штучны Інтэлект») і ўжо збірае заяўкі ад першых нейрасеткавых удзельніц. У судзейскай калегіі, як аказалася, таксама будуць штучныя мадэлі, пра адну з якіх мы пісалі раней.
Глабальная ініцыятыва па адсочванні дасягненняў ў галіне ШІ World AI Creator Awards (WAICA) у супрацоўніцтве з буйной платформай па стварэнні нейрасеткавага кантэнту Fanvue аб'явіла набор заявак на першы ў свеце конкурс прыгажосці сярод штучных мадэляў-жанчын.
Да ўдзелу ў конкурсе «Міс ШІ» дапускаюцца жывыя аўтары не маладзейшыя за 18 гадоў разам са сваімі штучнымі мадэлямі, якія таксама павінны выглядаць па-даросламу. Другой абавязковай умовай з'яўляецца актыўнасць штучнай мадэлі ў сацсетках, каб журы магло ацэніць іх аватары і іншыя фатаграфіі.
«Ацэнка кандыдатак будзе адбывацца па крытэрыях дасканаласці і праўдападобнасці іх візуальнай выявы класічным стандартам жаночай прыгажосці, крэатыўнасці і ўнікальнасці мадэляў, а таксама па іх навыках узаемадзеяння з аўдыторыяй і адказах на асабістыя пытанні, якія будзе задаваць судзейская калегія», — паведамляюць арганізатары конкурсу «Міс ШІ».
У самой калегіі, акрамя звычайных судзяў, таксама будуць штучныя мадэлі, а менавіта дзве віртуальныя жанчыны з актыўнымі і папулярнымі акаўнтамі ў сацсетках. Пра адну з іх, Айтану Лопес, «Наша Ніва» пісала яшчэ ў мінулым годзе.
Як адзначаюць арганізатары «Міс ШІ», пераможца конкурсу атрымае грашовы прыз у памеры 5000 даляраў. Яшчэ адныя 5000 даляраў будуць выдаткаваныя на PR-падтрымку сацсетак мадэлі-пераможцы, а самому аўтару яшчэ дадуць доступ да праграмы настаўніцтва па навыках працы з ШІ на суму 3000 даляраў.
Другое і трэцяе месцы атрымаюць аналагічныя прызы, але ў меншым памеры.
Калі браць толькі грашовы ганарар за першае месца, то штучная пераможца конкурсу «Міс ШІ» атрымае амаль столькі ж, колькі і «Міс Беларусь — 2023» Элеанора Качалоўская, якой, паводле правілаў, далі прыз у памеры 500 базавых велічынь (18500 беларускіх рублёў па курсе базавай велічыні за 2023 год, ці каля 5700 даляраў па афіцыйным курсе на момант фіналу конкурса).
«Міс Беларусь — 2023» не змагла адказаць, хто напісаў «Паўлінку»
Сам набор на конкурс «Міс ШІ» скончыцца 10 мая.
Цяпер чытаюць
Каля плошчы Бангалор у Мінску вырас яшчэ адзін звышсакрэтны аб’ект23
Каля плошчы Бангалор у Мінску вырас яшчэ адзін звышсакрэтны аб’ект
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары