Гарыць найбуйнейшае на Зямлі балота. Яно прыкладна роўнае Беларусі
Жывёлы гінуць тысячамі.
Найбуйнейшае балота Зямлі — Пантанал у Паўднёвай Амерыцы — ахоплена агнём. Жывёлы гінуць тысячамі, бальніцы перапоўненыя пацыентамі з рэспіраторнымі захворваннямі, піша Расійская служба Радыё Свабода.
У першым паўгоддзі плошча пажараў на Пантанале павялічылася на 1500% у параўнанні з аналагічным перыядам мінулага года і ўжо дасягнула ўзроўню 2020 года, які называюць «годам полымя».
Плошча балота складае па розных падліках складае 150-190 тысяч квадратных кіламетраў, што амаль роўна тэрыторыі Беларусі.
Сёлета згарэла ўжо больш за 760 тысяч гектараў, што складае каля пяці працэнтаў усёй плошчы балота, якое знаходзіцца пераважна ў Бразіліі (таксама часткова ў Балівіі і Парагваі).
Мяркуючы па відэа The Guardian, зялёны хмызняк ператварыўся ў шэра-белы дыван попелу з пнямі дрэў.
Пантанал — унікальная экасістэма, тут прадстаўлены больш за дзве тысячы відаў раслін і больш за дзесяць тысяч відаў жывёл, у тым ліку выміраючыя гіганцкія выдры, балотныя алені і гіяцынтавыя ара. Валанцёры распавядаюць, што бачылі «сотні і сотні мёртвых жывёл» толькі за апошні тыдзень.
«Рэптыліі, змеі, жабы — усе жывёлы, якія не ўмеюць бегаць, — у іх няма ніводнага шанцу», — кажа адзін з добраахвотнікаў, які ратуе жывёл ад агню. Малпы гінуць, удыхаючы дым, ягуары атрымліваюць цяжкія апёкі.
The giant otter (Pteronura brasiliensis) pic.twitter.com/NIlZz1oSlo
Мясцовыя бальніцы перапоўненыя пацыентамі з рэспіраторнымі захворваннямі — больш за ўсё ад дыму пакутуюць дзеці да пяці гадоў і пажылыя. Улады спрабуюць тушыць агонь, але вецер раздзімае яго зноў, кажуць мясцовыя жыхары.
У летні сезон дажджоў Пантанал насычаецца вадой, а зімой высыхае. Аднак кліматычны крызіс парушыў гэтую сезоннасць: сёлета на балоце выпала мала дажджоў, а пажары пачаліся на месяц раней.
З 1985 года Пантанал страціў ужо 68% сваёй плошчы.
Эксперты асцерагаюцца, што 2024 год стане самым разбуральным за апошнія дзесяцігоддзі. «Пантанал становіцца ўсё больш сухім. Раней яго затапляла на шэсць месяцаў, а цяпер — толькі на два-тры», — кажа Густава Фігейроа, біёлаг з SOS Pantanal.
Большасць пажараў на балоце ўзнікае па віне чалавека. Больш за 90% тэрыторыі Пантанала знаходзіцца ў прыватнай уласнасці — і ўладальнікі працягваюць падпальваць сухую расліннасць, каб расчысціць зямлю для жывёлы.
Так яны рабілі на працягу стагоддзяў. Але калі раней пажары ўтрымлівала назапашаная ў балоце вада, то зараз агонь спыняць няма чаму.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасся ў чатах палітэміграцыі, а некаторым дзяўчатам нават прапаноўваў абмяняцца нюдсамі
Каментары
Tut niama da čaho prykrascisia ūplyvovamu suspiļstvu, za luzera prymuc`, kali pačnieš u ekaliohiju ūkladacca... Praūda, Mask ??? Niachaj haryc`?