Раіла біць нагой у сківіцу кожнаму маскваротаму, называла акупацыю Марыупаля кармай — хто такая Ірына Фарыён, якую забілі ў Львове

У следства дзве асноўныя версіі па забойстве Ірыны Фарыён у Львове.

«Асноўныя версіі, якія разглядаюцца на гэты момант: асабістая непрыязнасць, грамадска-палітычная дзейнасць спадарыні Фарыён. Мы не выключаем, што забойства носіць заказны характар», — сказаў кіраўнік МУС Украіны Ігар Кліменка на начным брыфінгу ў Львове.

Паводле яго слоў, камеры на месцы забойства не працавалі з-за перабояў са святлом.

Нагадаем, што ў былую дэпутатку Вярхоўнай Рады ад партыі «Свабода» стралялі вечарам у пятніцу. Падчас замаху яна атрымала цяжкое раненне і была шпіталізаваная, на момант паступлення яе стан быў вельмі цяжкі. Больш за тры гадзіны дактары змагаліся за яе жыццё, але нічога зрабіць не змаглі. У 23.20 60-гадовая Ірына Фарыён памерла. Забойца, паводле апошніх звестак, пакуль не затрыманы.

Хто такая Ірына Фарыён

Ірына Фарыён была вядомай абаронцай украінскай мовы, філалагіняй, прафесарам, чальцом партыі «Свабода». Яна не раз трапляла ў скандалы з-за сваіх рэзкіх выказванняў у абарону ўкраінскай мовы, піша Бі-бі-сі — Украіна.

Фарыён нарадзілася і вырасла ў Львове, атрымала філалагічную адукацыю і ўсё жыццё працавала ў сферы ўкраінскай філалогіі, мела навуковае званне доктара філалагічных навук і амаль 30 гадоў выкладала ў Львоўскай палітэхніцы. Яна займала пасаду прафесара кафедры ўкраінскай мовы.

Актыўную дзейнасць у кансерватыўна-нацыяналістычнай «Свабодзе» Фарыён пачала ў пачатку «нулявых». З 2006 года была дэпутатам Львоўскай абласной рады і рэгулярна балатавалася ў Вярхоўную Раду. Але ў парламент здолела прайсці толькі адзін раз у 2012 годзе.

Самай вядомай зрабілі яе вострыя, часта на мяжы паліткарэктнасці заявы аб укараненні ўкраінскай мовы і хейтарскія выпады ў адрас усяго, што звязана з Расіяй.

У 2010 годзе яна крытыкавала імёны дзяцей, якія здаваліся ёй недастаткова ўкраінскімі.

Пасля абрання ў парламент, калі ва ўладзе быў Віктар Януковіч і Партыя рэгіёнаў, палітык актыўна выступала супраць усіх ініцыятыў, якія абмяжоўвалі выкарыстанне ўкраінскай мовы.

У 2014 годзе «Свабода» не прайшла ў парламент, а спадарыня Фарыён вярнулася ў Львоў.

У 2014-2019 прафесар вяла гістарычны праект на тэлеканале «Рада» «Веліч асобы». Яго мэтай была папулярызацыя выбітных фігур Украіны ад Сцяпана Бандэры да Івана Мазепы.

У 2017 годзе яна заклікала не даваць працу і адукацыю тым, хто не гаворыць на ўкраінскай, а пасля сваркі з тэлевядучым Дзмітрыем Гардонам на камеру прайшла дэтэктар хлусні, каб абвергнуць, што яна — агент ФСБ.

У 2018-м палітык раіла «біць нагой у сківіцу кожнаму маскваротаму», каб атрымаць перамогу ў вайне, а ў 2023-м заявіла, што акупацыя Марыупаля і гібель тысяч яго жыхароў падчас расійскага ўварвання — «кармічнасць» і «дэтэрмінізм».

У 2013 годзе журналісты апублікавалі дакументы, што Фарыён была ў камсамоле і нават членам Камуністычнай партыі.

Фарыён не стала каментаваць гэтыя выкрыцці, заявіўшы, што «арліцы не спавядаюцца перад гіенамі». А пасля пацвердзіла, што была камуністкай, але толькі, каб «разбураць іх (камуністаў) знутры».

У лістападзе 2023 года СБУ адкрывала крымінальную вытворчасць у дачыненні да Ірыны Фарыён. Перад тым яна ў інтэрв'ю рэзка раскрытыкавала ўкраінскіх вайскоўцаў, якія працягваюць размаўляць на расійскай мове.

Пасля разгарэўся скандал, яна апублікавала словы падтрымкі на свой адрас аднаго са сваіх падпісчыкаў з Крыма. У публікацыі былі персанальныя даныя падпісчыка. Пасля гэтага ў Крыме яго нібыта затрымалі расійскія спецслужбы.

Студэнты выйшлі на пратэст у Львове і патрабавалі звальнення прафесара.

15 лістапада 2023 года Львоўская палітэхніка звольніла Фарыён.

У маі 2024 года Львоўскі апеляцыйны суд аднавіў яе на пасадзе прафесара і прысудзіў ёй кампенсацыю. Фарыён купіла 11 дронаў для вайскоўцаў за грошы, якія адсудзіла ў Львоўскай палітэхнікі.

Па стане на 19 ліпеня дасудовае расследаванне па крымінальнай справе супраць Ірыны Фарыён працягвалася. У прыватнасці, у артыкуле аб абразе гонару і годнасці вайскоўца. СБУ ініцыявала псіхолага-лінгвістычную экспертызу выказванняў Фарыён.

• 4
• 0
• 3
• 0
• 5
• 15
• 1
• 2