У Расіі крытычны дэфіцыт байцоў, сфарміравалі мотастралковы полк са складу паветраных сілаў
«Гэта прыкладна, як мотастралковы полк хору Аляксандрава», — кпіць расійскі вайсковы блогер.
На новае фарміраванне — мотастралковы полк Паветрана-касмічных сіл Расіі (ПКС) звярнуў увагу капітан ПКС Ілля Туманаў (Fighterbomber). У сваім тэлеграм-канале ён піша, што полк створаны тыдзень таму. Людзей у яго набіралі па ўсёй Расіі. Сярод іх як інжынерна-тэхнічны, так і лётна-пад'ёмны, а таксама лётны склад.
«Сяржанты, прапаршчыкі і афіцэры. Здаецца, нават адзін штурман ёсць», — дзеліцца інфармацыяй ваенкар і дадае з сарказмам:
«Ваююць норм. Як усе. Усім забяспечаныя. Скаргаў няма. Усё добра. Гэта прыкладна, як мотастралковы полк хору Аляксандрава. Ну ці ДШБ (дэсантна-штурмавая брыгада — НН) ЦСКА. Павінен быць нейкі пасыл ці вывад. Але яго няма».
Выснову робіць аўтар іншага тэлеграм-канала — «Vault 8. Убежище».
Ён тлумачыць, што такія новыя фарміраванні пачалі з'яўляцца прыкладна са снежня 2023 года з-за боязі ўладаў праводзіць другую хвалю мабілізацыі ва ўмовах падрыхтоўкі пастаяннага, без аператыўных паўзаў «пазіцыйнага наступу».
У Маскве баяцца, што новая мабілізацыя прывядзе да сацыяльнага выбуху і рэвалюцыі.
У выніку «розныя рады войск выграбаюць кантрактны асабовы склад для папаўнення ці фарміравання новых падраздзяленняў і нават часцей».
Аўтар сцвярджае, што да гэтага чуў пра тое, што кантрактнікаў на флоце пераводзяць у брыгады марской пяхоты, ператвараюць каменданцкія ўзводы ў штурмавыя. Яму вядомыя выпадкі пераводу некалькіх «непатрэбных» сувязістаў у штурмавую роту, а вайскоўцаў з роты матэрыяльнага забеспячэння ва ўзвод БПЛА, бо «сувязістаў па кантракце ці мабілізацыі не з'явілася».
«Сфарміраваць з мінамётнай батарэі эвакагрупу — пасля страты матчасткі. Расфарміраваць снайперскі ўзвод снайперскай роты, каб перакінуць асабовы склад у штурмавы ўзвод»,
— прыводзіць іншыя прыклады ваенкар і дадае, што акрамя гэтага, каб захаваць колькасны склад, былі завышаныя патрабаванні да траўматызму пасля ранення як падстава для дэмабілізацыі. «У выніку маса калек у ППД (пунктах пастаяннай дыслакацыі — НН), з якіх асобныя камандзіры выграбаюць папаўненні для штурмаў».
«Усё гэта званочкі (а МСП ПКС дык наогул набат) пра тое, што альбо будзе замірэнне, альбо другая хваля мабілізацыі», — адзначае ваенкар.
Першапрычына дэфіцыту байцоў — вялізныя страты расійскай арміі. На сёння вядомыя пайменна больш за 61 тысячу забітых ва Украіне. Эксперты мяркуюць, што ўсяго на сёння расійская армія і наёмныя структуры, якія ваююць разам з ёй, панеслі страты ў прыкладна 120 тысяч забітымі і 450 тысяч параненымі. Такіх ваенных страт не несла ніводная з развітых дзяржаў свету пасля Другой сусветнай вайны.
Каментары