У першым паўгоддзі 2024 года Беларусь заняла 54 месца ў індэксе злачыннасці па версіі Numbeo, піша thinktanks.by. Партал Numbeo фарміруе рэйтынгі на аснове апытанняў карыстальнікаў сайта за апошнія 36 месяцаў.
Для складання Crime Index эксперты ўлічвалі такія паказчыкі, як агульнае ўспрыманне ўзроўню злачыннасці, адчуванне бяспекі, занепакоенасць з нагоды канкрэтных злачынстваў, ацэнка ўзроўню злачынстваў супраць уласнасці, ацэнка ўзроўню гвалтоўных злачынстваў.
Для ацэнкі краін выкарыстоўваецца шкала ад 0 да 100. Стваральнікі рэйтынгу лічаць, што адзнака ніжэй за 20 адпавядае краінам з вельмі нізкім узроўнем злачыннасці, ад 20 да 40 — з нізкім, ад 40 да 60 — з умераным, ад 60 да 80 — з высокім, а вышэй за 80 — з вельмі высокім.
Беларусь — адна з самых небяспечных краін Еўропы
Да 2020 года Беларусь абганяла не толькі суседнія краіны, але і многія еўрапейскія па ўзроўні бяспекі. Напрыклад, у пачатку 2020 года індэкс злачыннасці ў Беларусі ацэньваўся ў 24,99 бала, тады як Польшча знаходзілася на адзнацы ў 28,5 бала, Літва — у 33,06 бала, Латвія — у 36,95 бала, Расія — у 41,12 бала, Украіна — у 48,85 бала.
Аднак ужо ў пачатку 2021 года індэкс злачыннасці ў Беларусі рэзка ўзрос да адзнакі ў 60,27. З кожным годам гэты паказчык патроху зніжаецца, але
на момант першага паўгоддзя 2024 года Беларусь па-ранейшаму застаецца адной з самых небяспечных краін Еўропы з паказчыкам 50,6 бала. Вышэй сярод еўрапейскіх краін — толькі ў Францыі (55,3 бала).
Беларусь і суседзі
У першым паўгоддзі 2024 года Беларусь заняла ў рэйтынгу 54-е месца з паказчыкам 50,6 бала. У параўнанні з 2023 годам наша краіна крыху палепшыла свае пазіцыі. У першым паўгоддзі мінулага года Беларусь набрала 51,4 бала.
Бліжэй за ўсё да Беларусі апынулася Украіна, набраўшы 46,8 бала. Далей ідзе Расія з паказчыкам 38,9 бала. Латвія набрала 37,3 бала, Літва — 32,5 бала, Польшча — 29,1 бала. У параўнанні з мінулым годам свае паказчыкі крыху палепшылі Расія і Літва.
Самыя небяспечныя краіны свету
Тройка самых небяспечных краін свету зведала невялікія змены. Калі ў 2023 годзе ў яе ўваходзілі Венесуэла, Папуа — Новая Гвінея і Афганістан, то ў 2024 годзе Гаіці памянялася з Афганістанам месцамі, заняўшы трэцюю пазіцыю ў антырэйтынгу.
У першым паўгоддзі 2024 года Венесуэла набрала 80,9 бала, Папуа — Новая Гвінея — 80,1 бала, Гаіці — 78,7 бала.
Цяпер чытаюць
Памятаеце Данілу з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў і з чаго ўсё пачалося
Каментары
Вы же пытаетесь быть журналистами? Вам ли не знать, как проводятся опросы ;))
Кстати, забыли специально про Францию и Бельгию?;))