У Расіі YouTube перастаў працаваць у высокай якасці амаль ва ўсіх браўзэрах
Амерыканскі відэахостынг YouTube цяпер не прайграе відэа ў высокай якасці ў большасці браўзэраў на тэрыторыі Расіі, якія ўсталяваныя на стацыянарных камп'ютарах і ноўтбуках, паведаміла агенцтва ТАСС.
Праблемы з трансляцыяй узнікаюць у Google Chrome, Opera, Mozilla Firefox і Mi Browser.
Паводле даных агенцтва, пакуль карэктна працуюць толькі «Яндэкс браўзэр» і Safari, аднак мабільная версія апошняга перакідвае карыстальніка ў дадатак відэахостынгу.
З 1 жніўня карыстальнікі YouTube у Расіі пачалі масава паведамляць пра рэзкае пагаршэнне працы хостынгу. На наступны дзень сэрвіс «Сбой.рф» зафіксаваў больш за 15 тыс. скаргаў, што значна перавышае звычайныя паказчыкі, якія трымаліся на ўзроўні некалькіх дзясяткаў у суткі.
Незадоўга да гэтага кіраўнік камітэта Дзярждумы па інфармацыйнай палітыцы Аляксандр Хінштэйн анансаваў зніжэнне хуткасці загрузкі YouTube да 70% у пачатку жніўня. Пра гэта ж 30 ліпеня пачалі папярэджваць мабільныя аператары. У той жа час афіцыйны Крэмль сцвярджае, што, маўляў, рэч тут не ў абмежаваннях, а ў праблемах з абсталяваннем з-за накладзеных на Расію санкцый.
Крыніца ў адміністрацыі прэзідэнта Расіі паведаміла выданню «Газета.ру», што доступ да YouTube у гэтай краіне могуць абмежаваць ужо ў верасні, а запаволенне працы сэрвісу з'яўляецца падрыхтоўкай да будучага поўнага блакавання платформы.
Сярэднясутачны ахоп YouTube у Расіі складае 55,4 млн чалавек. Расійскія ўлады выношваюць планы блакавання папулярнага відэахостынгу з самага пачатку поўнамаштабнага ўварвання ва Украіну ў тым ліку таму, што ён стаў галоўнай платформай для апазіцыйнага і антываеннага парадку дня.
Каментары