«Не выключаю, што гэбісты». Дзяўчына хацела зарэгістравацца ў беларускім дадатку для знаёмстваў — а яе нехта апярэдзіў
7 жніўня свет пабачыў новы мабільны дадатак для знаёмстваў «Віт!» — ён створаны беларусамі для беларусаў. Супрацоўніца «Белсата» Лілія Гусарава захацела ў ім зарэгістравацца, але раней за яе гэта зрабіў нехта іншы, стварыўшы фэйкавую старонку дзяўчыны з памылковымі данымі.
«Я зарэгістравалася там у суботу, — расказвае дзяўчына больш дэталёва. — Анкету запоўніла на наступны дзень, дадала фоты. Але яшчэ да запаўнення мне напісаў знаёмы, што пабачыў мяне ў гэтым дадатку, спытаў, як мне наогул апка (мабільная аплікацыя, дадатак, скарочанае ангельскае App. — НН). Я спачатку не зразумела, бо мая старонка не паказвалася нікому, пакуль я не запоўню анкету і не дадам здымкі. Пасля ўжо зразумела, што ён меў на ўвазе, бо пабачыла сама свой клон».
У фэйкавым акаўнце размясцілі два фотаздымкі Ліліі. З большага ўсе звесткі ў анкеце былі некарэктныя: напрыклад, там пазначылі, што дзяўчыне 23 гады, хаця ёй 27. Усе пункты ў раздзеле «Зацікаўленасці» таксама былі міма, як і рост са знакам задыяка.
«У «Пра сябе» там пакінулі жудасна пафасную фразу, якую я б ніколі не напісала: «Добрая, мілая, люблю Беларусь і яе вольны народ». Нягледзячы на тое, што я сапраўды люблю Беларусь і беларусаў. Але гэта любоў ідзе са мной аўтаматам», — тлумачыць суразмоўца.
Дзяўчына адразу ж напісала таму акаўнту і, не атрымаўшы адказаў, паскардзілася на старонку. На дадзены момант яна не паказваецца ў аплікацыі. Тое, што старонку заблакавалі пасля скаргаў, нам пацвердзілі і ў тэхнічнай падтрымцы «Віт». Перад гэтым карыстальніку было прапанавана пацвердзіць асобу.
Таксама да фэйкавай старонкі ў якасці кантакта быў прывязаны тэлеграм-акаўнт. Мы прабілі яго па розных ботах — адназначна, што ён свежаствораны.
«Асабліва пужае, што гэта маглі быць гэбісты. І такім чынам яны маглі выпытаць нейкую інфармацыю, якая можа нашкодзіць іншым людзям.
Тым больш нядаўна была гісторыя, як прапагандысты званілі людзям у замежжа і прадстаўляліся маёй калегай (гаворка ідзе пра стварэнне сюжэта для «Мінскай праўды». — НН). Так што я не выключаю, што гэта могуць быць гэбісты. Ад іх можна чакаць любой подласці».
Цяпер чытаюць
У пачатку 2000‑х трое настаўнікаў гісторыі збеглі ва Украіну ад «генацыду беларускага народа», які чыніў рэжым Лукашэнкі. Як склаўся іх лёс?5
Каментары