Пасля перакідання часцей пад Курск УСУ не хапае салдат і зброі на Данбасе

Салдаты, якія абараняюць падыходы да Часавага Яра і Пакроўскага, радуюцца поспехам у Курскай вобласці, але не ўпэўненыя, што гульня вартая свечак, піша The Wall Street Journal, карэспандэнты якога пабывалі на перадавой на Данбасе.

«Тысяча чалавек нам бы тут вельмі спатрэбілася», — сказаў газеце камандзір батальёна з пазыўным Кучар. Паводле яго слоў, калі вясной ягонае падраздзяленне прыбыло ў раён Краснагораўкі (сяла пад Пакроўскам, праз якое праходзяць шляхі забеспячэння ВСУ, у тым ліку для абароны Часавага Яра), у яго было прыкладна столькі ж салдат, колькі ў праціўніка на гэтым участку фронту. Цяпер жа расійскіх войскаў разоў у пяць больш, а ў Кучара страты ў жывой сіле папаўняюцца толькі на 20%.

Па словах маёра, чыё падраздзяленне апошнія два месяцы абараняе Часаў Яр, абарону цяпер трымаюць нават супрацоўнікі службаў забеспячэння — кухары, механікі і іншыя тылавікі:

«Там, дзе на пазіцыі павінна быць 5-6 чалавек, у нас два ці тры. Гэта толькі пытанне часу, калі вораг намацае слабое месца».

Сітуацыя на працягу лета ўскладняецца ўсё больш і больш, кажуць вайскоўцы УСУ на перадавой. Не хапае не толькі салдат, але і боепрыпасаў. Нягледзячы на пастаўкі амерыканскіх узбраенняў, якія аднавіліся летам, на некаторых участках фронту Расія па-ранейшаму мае 10-разовую перавагу ў артылерыйскай моцы. А прымяненне ёю сродкаў радыёэлектроннай барацьбы прывяло да таго, што цяпер толькі каля паловы дронаў з боепрыпасамі дасягаюць цэляў.

Камандзір артылерыйска-разведвальнага атрада пад Пакроўскам з пазыўным Сіфанеска сказаў WSJ:

«У рускіх усяго больш — людзей, гармат, снарадаў, боепрыпасаў. У выніку нам даводзіцца адступаць».

З-за недахопу снарадаў камандаванне загадала яго атраду страляць толькі па статычных цэлях:

«Нам даводзіцца чакаць, пакуль танк спыніцца, перш чым паспрабаваць падбіць яго».

Украіна паслала ў Курскую вобласць некаторыя з найбольш баяздольных падраздзяленняў, і Расія можа скарыстацца паслабленнем яе абароны на іншых участках фронту, падзяліліся сваёй занепакоенасцю з CNN некалькі заходніх чыноўнікаў.

«З ваеннага пункту гледжання гэта ўражвае», сказаў адзін з іх пра Курскую аперацыю, але «туды адпраўленыя вельмі дасведчаныя салдаты, якіх Украіна не можа сабе дазволіць страціць». А іх перакіданне з перадавой на расійскую тэрыторыю «дае Расіі магчымасць скарыстацца [колькаснай] перавагай і прарваць абарону».

Дэфіцыт салдат — адно з наступстваў буйных страт, панесеных УСУ падчас няўдалага леташняга контрнаступлення, кажа Роб Лі, старшы навуковы супрацоўнік еўразійскай праграмы Інстытута вывучэння знешняй палітыкі. Сітуацыя павінна палепшыцца да наступнага года, калі тыя, каго цяпер прызываюць у рамках мабілізацыі, пройдуць падрыхтоўку і змогуць уступіць у бой. Акрамя таго, да канца гэтага года павінна павялічыцца вытворчасць боепрыпасаў у заходніх краінах, адзначае Лі.

«Ва Украіне недастаткова рэзерваў. Ёй не хапае часцей, каб умацаваць фронт усюды, дзе неабходна».

• 2
• 3
• 1
• 2
• 2
• 20
• 2
• 0