Прарасійскія актывісты б'юць трывогу: у Брэсцкай крэпасці замазалі савецкі надпіс «здесь работал Павлов»
Прыхільнікі «рускага свету» патрабуюць рэпрэсаваць вінаватых, хоць каштоўнасць надпісаў выклікае пытанні.
Навіной падзяліўся брэсцкі прарасійскі актывіст Пётр Піцко ў сваім тыктоку. Ён распавёў, што надпісаў байцоў гарнізона, пакінутых на сценах Заходняга форта крэпасці, больш няма.
«Тут працуе здымачная група, нейкі надзвычай хамаваты мужчына паведаміў мне, што ён сам сабе навуковы кіраўнік, і ўсё, што тут знаходзілася, навуковай каштоўнасці не ўяўляе», — патлумачыў Піцко.
Актывіст паказаў зафарбаванае месца, дзе знаходзіўся надпіс «здесь работал Павлов г. Псков», які быў нанесены тонкім алоўкам.
«Яго ўвогуле немагчыма было заўважыць, чым ён перашкодзіў гэтым спецыялістам я не разумею. Але цяпер там, дзе былі сляды савецкіх салдат, проста белая шпаклёўка», — абураецца актывіст.
Як слушна заўважылі некаторыя каментатары, надпіс «тут працаваў» хутчэй за ўсё пакінулі шабашнікі, якія ўдзельнічалі ў аднаўленні крэпасці пасля вайны, а таму іх гістарычная каштоўнасць невялікая.
Але большасць падпісчыкаў Піцко таксама абурылася і запатрабавала прыцягнуць вінаватых да адказнасці, звярнуўшыся да Лукашэнкі. «Ён прымусіць саскрэбці гэты тынк пазногцямі», — упэўненыя лукашысты.
Піцко прыгадаў свае даўнія крыўды на Міністэрства культуры, чые спецыялісты не прысутнічаюць сёння на работах у крэпасці, але набеглі, калі ён самавольна аднавіў савецкія надпісы на будынках крэпасці.
«Знішчэнне савецкіх надпісаў будзе ўзнагароджана не штрафам, а грашовай прэміяй».
У 2018 годзе актывіст разгарнуў сваю дзейнасць у гістарычных казармах Брэсцкай крэпасці, пасля чаго быў пакараны за незаконныя работы.
Піцко вырашыў па ўласным разуменні, не маючы ні праекта, ні навуковага кіраўніка, заняцца аднаўленнем гістарычных будынкаў Брэсцкай крэпасці. Разам з паплечнікамі ён напісаў на сценах казармы савецкі лозунг «Да здравствует партия Ленина-Сталина — вдохновитель и организатор наших побед!», а таксама ў аркушах змясціў вытрымкі з савецкай Канстытуцыі і цытату Сталіна «Изучать противника, улучшать разведку, глаза и уши армии, помнить, что без этого нельзя бить врага наверняка».
Міністэрства культуры вырашыла, што такія дзеянні на гісторыка-культурнай каштоўнасці з’яўляюцца незаконнымі, і запатрабавала прыбраць усе надпісы і расцяжкі з помніка архітэктуры і гісторыі. Самога Піцко аштрафавалі на 10 базавых велічынь.
Летась яго зноў занепакоіла знішчэнне савецкай спадчыны ў Брэсцкай крэпасці. Прарасійскія актывісты западозрылі, што рэканструкцыя крэпасці пад цэнтр патрыятычнага выхавання прывядзе да знішчэння надпісаў, пакінутых ветэранамі Вялікай Айчыннай вайны ў 1945-1947 гадах (то-бок ужо пасля вайны), а таксама, як яны сцвярджалі, адзінай у свеце насценнай выявы першага гімна СССР, у якім праслаўлялі Сталіна.
Прарасійскія актывісты ўспамінаюць пра ахову спадчыны, толькі калі справа ідзе пра памяць пра вайну ці Сталіна, але застаюцца абсалютна абыякавымі да знішчэння савецкай міжваеннай архітэктуры, не кажучы пра любую іншую.
«Наша Нiва» — бастыён беларушчыны
ПАДТРЫМАЦЬЦяпер чытаюць
Часам нечаканая гісторыя беларускіх гімнаў: «Мы выйдзем шчыльнымі радамі», «Пагоня», «Жыве Беларусь», «Радзіма мая дарагая», «Магутны Божа» (з ВІДЭА)99
Каментары
Сапраўдны жах,што гэта істота мае беларускае прозвішча, але па духу ардынская смярдзючая ануча, калабарант-здраднік.
Дый яшчэ: ніякі кал-хознік руссскай здымачнай групе анічога не зробіць,бо сам ануча пад нагамі тахтамыша.