У Ганконгу 45 лідараў дэмакратычных пратэстаў 2019 года прысудзілі да турэмных тэрмінаў
Тады на вуліцы Ганконга выйшлі сотні тысяч людзей.
Суд у Ганконгу вынес прысуды ключавым лідарам дэмакратычных пратэстаў 2019 года. 45 чалавек атрымалі турэмныя тэрміны ад чатырох да 10 гадоў, іх прызналі вінаватымі ў змове з мэтай звяржэння ўлады. Яшчэ двух актывістаў апраўдалі, піша Бі-бі-сі.
Бені Тай атрымаў самы вялікі тэрмін — 10 гадоў. Іншы лідар пратэстаў, Джошуа Вонг, прысуджаны да чатырох гадоў і васьмі месяцаў турмы. Суд скараціў яго тэрмін на трэць пасля таго, як Вонг прызнаў віну.
Чатырох іншых актывістаў, у тым ліку грамадзяніна Аўстраліі Гордана Нга, суд назваў арганізатарамі пратэстаў і прысудзіў да тэрмінаў да сямі гадоў і трох месяцаў турмы. Іншыя атрымалі ад чатырох да сямі гадоў турмы.
Дзясяткі жыхароў Ганконга выстройваліся ў чаргу перад будынкам суда за некалькі дзён да пачатку працэсу, каб забяспечыць сабе месца ў зале. Сярод іх быў Лі Ю-Шун, адзін з двух апраўданых актывістаў. Ён заклікаў ганконгцаў «задаваць пытанні» аб крымінальнай справе, бо яе вынік «можа датычыцца кожнага».
Гэты судовы працэс — найбольшы пасля прыняцця закону аб нацыянальнай бяспецы, які Пекін увёў у Ганконгу неўзабаве пасля маштабных пратэстаў 2019 года.
Тады на вуліцы Ганконга выйшлі сотні тысяч людзей. Падставай для пратэстаў стаў законапраект, які дазваляў экстрадыцыю з Ганконга ў мацерыковы Кітай. Аднак хутка пратэстоўцы пачалі патрабаваць шырокіх дэмакратычных рэформаў.
Бені Тай распрацаваў неафіцыйныя праймерыз — папярэдні адбор апазіцыйных кандыдатаў — на мясцовыя выбары, якія былі запланаваны на 2020 год Больш за паўмільёна жыхароў Ганконга прынялі ўдзел у праймерыз, але ўлады Кітая і Ганконга ўбачылі ў гэтым спробу зрынуць уладу. Актывістаў, уключаючы Бені Тая, арыштавалі ў пачатку 2021 года. Джошуа Вонг да таго часу ўжо знаходзіўся пад арыштам.
Тым часам улады Кітая і Ганконга заяўляюць, што гэты закон неабходны для забеспячэння стабільнасці і адмаўляюць, што ён абмяжоўвае аўтаномію Ганконга.
Каментары