Квадрат па прапановах у сталіцы пераадолеў адзнаку $2200, таму нават самыя танныя кватэры ў Мінску каштуюць нямала. Паглядзелі, што прапануе рынак сталічнай нерухомасці па нізе рынку.
Дзве самыя танныя прапановы ў Мінску класічнай кватэрай не назавеш. Адна з іх — нежылая студыя на 12 квадратаў, якую можна вывесці ў жылы фонд, за $34900. Другая — кватэра ў цагляным аднапавярховым доме з драўлянай прыбудовай на Аўтазаводскім завулку за $50100. Таму іх у спіс не ўключаем.
Кватэра ў Мінску, але ёсць нюанс
Самая танная тыповая кватэра каштуе $54900.
Столькі просяць за аднапакаёўку на 30 квадратаў, якая знаходзіцца на вуліцы Акадэміка Красіна, 47, што за некалькі кіламетраў ад МКАД, але фармальна гэта Мінск і сталічная рэгістрацыя.
Гэта кватэра на другім паверсе пяціпавярховага дома.
Ёсць асобная кухня, калідор і ванны пакой з туалетам і ваннай. Уваходныя дзверы металічныя, рамонт стары, на столі — касітоны, якія месцамі адвальваюцца.
Сам дом 1967 года пабудовы, цагляны, а ў 2022 годзе перажыў капрамонт.
Зноў за МКАДам
За $55 тысяч прадаюць аднапакаёўку ў мікрараёне «Сокал».
Гэта кватэра на чацвёртым паверсе пяціпавярховіка 1989 года пабудовы. Агульная плошча — 34,4 метра.
Рамонт стары, вокны пластыкавыя, ёсць балкон, па якім відаць, што дом ужо пасля рэнавацыі.
Аднапакаёўка ў Шабанах
За $58500 прадаюць аднапакаёўку ў Шабанах. Месціцца яна на пятым паверсе дзевяціпавярховай панэлькі 1993 года пабудовы па адрасе Бачыла, 7/3.
Агульная плошча кватэры — 33,5 метра. Выглядае, што рамонт апошні раз у ёй рабілі 30 гадоў таму.
Таму да $58500 трэба дадаць яшчэ не адзін дзясятак на капітальны рамонт і мэблю. Нават вокны ў гэтай кватэры драўляныя, таму інвеставаць давядзецца шмат.
З плюсаў — гэта ўсё ж такі не хрушчоўка, а больш сучаснае жытло з адносна высокімі столямі.
Шабаны 2.0
Яшчэ адна кватэра ў бюджэце да $60 тысяч знаходзіцца па суседстве ў тых жа Шабанах, па адрасе Сяліцкага, 105.
За аднапакаёўку на восьмым паверсе дзевяціпавярховіка 1992 года пабудовы просяць $59 тысяч.
Каб заехаць у яе, таксама давядзецца шмат укласці. Адзінае, што ў адрозненне ад папярэдняга варыянта ў гэтай кватэры стаяць новыя пластыкавыя вокны.
Пяць хвілін да Свіслачы
$59 тысяч просяць за аднапакаёўку на 25 метраў. Яна знаходзіцца па адрасе Новавіленская, 24 (апошні паверх трохпавярховага дома).
Плошча кухні — усяго 4,4 метра. Асноўны пакой — амаль на 18 квадратаў. Сярод пераваг прадавец адзначае блізкасць да ракі Свіслач, парку і зялёнай зоны. Апроч таго, хутка непадалёку пабудуюць метро.
Дзядок расказаў, як паводзіў бы сябе ў сённяшняй Беларусі і што будзе далей5
Каментары
Я лучше куплю в регионе за 20000 и буду дышать более чистым воздухом, чем в Минске
Лукашизм головного мозга!....