Ізраіль упершыню прызнаў, што забіў лідара ХАМАСа Ісмаіла Ханію ў Іране
Міністр абароны Ізраіля Ісраэль Кац упершыню прызнаў, што ізраільскія ўлады стаяць за забойствам кіраўніка Палітбюро групоўкі ХАМАС Ісмаіла Ханіі ў Тэгеране ў ліпені гэтага года, піша Бі-бі-сі.
Кац згадаў пра гэта, гаворачы пра барацьбу Іранам хусітамі ў Емене, якія запускаюць ракеты і беспілотнікі па тэрыторыі Ізраіля і якіх падтрымлівае Іран.
Паводле міністра, ізраільскія ўлады «нанясуць удар па інфраструктуры хусітаў і знішчаць іх кіраўніцтва».
«Таксама, як мы зрабілі з Ісмаілам Ханіяй, Ях'ёй Сінварам і Хасанам Насрала ў Тэгеране, сектары Газы і Ліване, мы зробім у Хадэйдзе і Сане» (гарады ў Емене), — заявіў ён, маючы на ўвазе яшчэ двух лідараў ліванскай «Хезбалы» і ХАМАС, якія былі забітыя ў гэтым годзе.
62-гадовы Ханія быў забіты ў сваёй рэзідэнцыі ў іранскай сталіцы 31 ліпеня, калі прыехаў на інаўгурацыю прэзідэнта Ірана Масуда Пезешкіяна. Па доме быў, імаверна, нанесены авіяўдар.
Пасля яго смерці ХАМАС прызначыў новым лідарам Ях'ю Сінвара, якога Ізраіль называў арганізатарам нападу ў кастрычніку 2023 года.
Сінвар быў забіты ізраільскімі вайскоўцамі падчас выпадковай сустрэчы ў сектары Газы ў кастрычніку, і групоўка ўсё яшчэ знаходзіцца ў працэсе выбару новага лідара.
Хусіты, якія кантралююць паўночна-заходні Емен, пачалі атакаваць ізраільскія і міжнародныя судны ў Чырвоным моры неўзабаве пасля таго, як Ізраіль пачаў аперацыю супраць ХАМАС у Газе ў кастрычніку мінулага года, а таксама запускаць ракеты і дроны на ізраільскую тэрыторыю. Гэтыя атакі працягваюцца да гэтага часу.
«Кубло такое». З перапісак Кабанчука робіцца ясна, чаму Верамейчыка палічылі небяспекай і забаранілі яму ўезд ва Украіну34
Каментары
Тэль Авів праз паўгады ...нешта у " мертвым море" падохла.