Еўракамісія прадставіла план пераўзбраення ЕС і падтрымкі Украіны на 800 мільярдаў еўра
Старшыня Еўракамісіі Урсула фон дэр Ляен на брыфінгу ў Бруселі прадставіла пяціступеньчаты план пераўзбраення Еўрасаюза і падтрымкі Украіны, паведамляе «Еўрапейская праўда».
Паводле яе слоў, зараз пытанне не ў тым, што бяспека Еўропы пад пагрозай.
«Сапраўды мы ўжо ведаем адказы на гэтыя пытанні. Рэальнае пытанне для нас, ці гатова Еўропа дзейнічаць рашуча, як таго патрабуе сітуацыя. І ці гатова Еўропа дзейнічаць хутка», — сказала фон дэр Ляен.
Яна паўтарыла сваю папярэднюю заяву аб неабходнасці пераўзбраення Еўропы для забеспячэння ўласных патрэбаў і падтрымкі Украіны.
Менавіта таму, паводле яе слоў, яна накіравала еўрапейскім лідарам ліст перад самітам ЕС з пяціступеньчатым планам пераўзбраення Еўропы.
Першая частка плана — вызваленне дзяржаўных сродкаў для фінансавання абарон на нацыянальным узроўні.
«Дзяржавы-члены ўжо гатовы больш укладваць у абарону, калі маюць фіскальную прастору. Таму мы павінны дазволіць ім гэта. Таму мы прапануем магчымасць абходу Пакта аб росце і стабільнасці, што дасць магчымасць дзяржавам павялічыць расходы на абарону без запуску працэдуры празмернага дэфіцыту», — растлумачыла прэзідэнтка.
Паводле яе слоў, гэта дасць магчымасць вызваліць да 650 млрд еўра на працягу чатырох гадоў.
Другім элементам з'яўляецца новы інструмент, які забяспечыць 150 мільярдаў пазык дзяржавам-членам на абаронныя інвестыцыі ў сістэмы СПА, артылерыйскія сістэмы, ракеты і боепрыпасы, дронавыя і антыдронавыя сістэмы і сумесныя закупкі абсталявання.
«З гэтым абсталяваннем дзяржавы-члены ў вялікім маштабе змогуць нарасціць іх падтрымку Украіны. Размова ідзе аб неадкладнай пастаўцы ваеннага абсталявання для Украіны», — сказала фон дэр Ляен.
«Трэці пункт — гэта выкарыстанне бюджэту ЕС. У кароткатэрміновай перспектыве мы зможам накіраваць сродкі ў абаронныя інвестыцыі», — сказала таксама яна, анансаваўшы прапанову, па якой дзяржавы-члены змогуць выкарыстоўваць фонды згуртаванасці для павелічэння расходаў на абарону. Варта адзначыць, што выкарыстанне фондаў згуртаванасці не патрабуе аднадушнасці, таму Венгрыя ці Славакія не могуць заблакаваць такія рашэнні.
Два іншыя пункты прадугледжваюць мабілізацыю прыватнага капіталу шляхам пашырэння інвестыцыйнага рынку і праз Еўрапейскі інвестыцыйны банк.
«ЕС гатовы прыняць адказнасць. План пераўзбраення Еўропы можа мабілізаваць каля 800 мільярдаў еўра на абаронныя выдаткі для бяспечнай і ўстойлівай Еўропы», — падкрэсліла прэзідэнт ЕК.
Новая архітэктура бяспекі ЕС пачне фармавацца на экстраным пасяджэнні лідэраў ЕС 6 сакавіка. 19 сакавіка камісар па пытаннях абароны Андрус Кубілюс і кіраўнік дыпламатыі Кая Калас прадставяць новую абаронча-прамысловую стратэгію.
Цяпер чытаюць
Медсястра з Лепеля закахалася ў расійскага вайскоўца і паехала наёмніцай на фронт ва Украіну20
Каментары