Перамовы паміж ЗША і Украінай па пагадненні аб карысных выкапнях працягваюцца.
У сераду Белы дом заявіў, што пераглядае пытанне аб прыпыненні фінансавання Украіны, а перамовы паміж ЗША і Украінай па пагадненні аб карысных выкапнях працягваюцца, піша «Голас Амерыкі».
«Рада нацыянальнай бяспекі паведаміла мне з гэтай нагоды, што яны пераглядаюць пытанне аб фінансаванні Украіны, аб прыпыненні фінансавання», — заявіла журналістам прэс-сакратарка Белага дома Кэралін Левіт.
Прэзідэнт ЗША Дональд Трамп прыпыніў пастаўку ваеннай дапамогі Украіне позна ўвечары ў панядзелак пасля гарачай дыскусіі з прэзідэнтам Украіны Уладзімірам Зяленскім у Белым доме на мінулым тыдні.
У панядзелак увечары высокапастаўлены прадстаўнік адміністрацыі прэзідэнта ЗША паведаміў карэспандэнту «Голасу Амерыкі» ў Белым доме аб прыпыненні ваеннай дапамогі Украіне.
Дональд Трамп заявіў у той дзень, што Зяленскі павінен выказваць больш падзякі за амерыканскую дапамогу, а таксама адмоўна адрэагаваў на публікацыю Associated Press, у якой была прыведзена цытата ўкраінскага лідара пра тое, што заканчэнне вайны «вельмі, вельмі далёка».
«Гэта найгоршая заява, якую мог зрабіць Зяленскі, і Амерыка больш не будзе гэта цярпець!» — напісаў Трамп на сваёй платформе Truth Social.
Аднак ужо ўвечары ў аўторак падчас свайго звароту да Кангрэсу ЗША прэзідэнт Дональд Трамп паведаміў, што атрымаў ліст ад прэзідэнта Украіны Уладзіміра Зяленскага.
Паводле слоў прэзідэнта ЗША, у гэтым лісце ўкраінскі лідар адзначыў, што Кіеў «гатовы сесці за стол перамоў» і што «ніхто не хоча міру больш, чым Украіна».
Трамп дадаў, што ў лісце Зяленскі выказаў падзяку ЗША за падтрымку і паведаміў пра гатоўнасць падпісаць пагадненне па рэдказямельных мінералах.
Каментары