Паглядзелі, у якія гарады дагэтуль возяць беларускіх аматараў закупаў.
У былыя часы шоп-туры ў Польшчу і Літву лічыліся нечым звычайным, асабліва для жыхароў прыгранічных Брэста і Гродна.
Але паколькі сітуацыя з межамі і правозам тавараў цягам апошніх гадоў толькі пагаршаецца, падобныя паездкі, хутчэй, рэдкасць.
Брэст
Прасцей за ўсё ездзіць на шопінг жыхарам Брэста. Адтуль дагэтуль можна адправіцца ў шоп-тур мікрааўтобусамі на 15-21 месца з прычэпамі. Праўда, выбар гарадоў не такі ўжо шырокі, як раней.
Так, напрыклад, адна з мясцовых фірм ладзіць амаль штодзённыя паездкі з Брэста ў Бялу-Падляску.
З Брэста выязджаюць а 22-й гадзіне, на праходжанне мяжы закладаюць 8 гадзін. Калі ўсё будзе ісці па плане, то а 19-й наступнага дня маршрутка мусіць вярнуцца ў Брэст. Кошт паездкі — 60 рублёў з чалавека.
Апроч Бяла-Падляскі, да якой ад беларускай мяжы менш за 50 кіламетраў, па суботах гэты ж перавозчык ладзіць шоп-туры ў Беласток. З Брэста выязджаюць прыблізна а 19-й вечара пятніцы, а з Беластока — а 16-й наступнага дня. Кошт паездкі — 100 рублёў.
Але нават у Брэсце перавозчыкаў, якія прапануюць падобныя паслугі, засталося не шмат.
У некаторых кампаній, якія некалі спецыялізаваліся на шоп-турах, сайты не абнаўляюцца з 2023-2024 гадоў, што дазваляе параўнаць цэны на паездкі. Напрыклад, некалі з'ездзіць на шопінг з Брэста ў Бялу-Падляску можна было ўсяго за 40 рублёў.
Гродна
Пасля таго, як Літва з 1 сакавіка 2024 года закрыла яшчэ два памежныя пераходы на мяжы з Беларуссю, Гродна з прыгранічнага горада ператварыўся ў тупіковы, таму шоп-туры з абласнога цэнтра зніклі.
Мінск
Шоп-туры з Мінска таксама былі даволі папулярнымі, праўда, у адрозненне ад гродзенцаў і берасцейцаў, жыхары сталіцы часцей ездзілі па закупы ў Літву, чым у Польшчу.
Аднак на сёння менавіта шоп-тураў з Мінска ў Вільню не засталося. Верагодна, адбылося гэта ў першую чаргу праз скарачэнне дазволаў на пасажырскія перавозкі з боку Літвы, бо чэргі з аўтобусаў на мяжы з Літвой — вялікая рэдкасць.
На сайтах турагенцтваў і перавозчыкаў інфармацыя або састарэлая (гэта бачна па цэнах — укласціся ў 100 рублёў за паездку па маршруце Мінск-Вільня-Мінск у сучасных умовах нерэальна), або напісана, што «тур часова прыпынены».
А вось шоп-туры з Мінска ў Беласток яшчэ захаваліся. Праўда, аўтобусы цяпер могуць трапіць туды толькі праз Брэст, бо праз Літву турыстычныя аўтобусы, якія накіроўваюцца ў Польшчу, больш не прапускаюць.
Шоп-туры ў Беласток цяпер прапануюць усяго некалькі перавозчыкаў. Цэны ад 150 да 195 рублёў з чалавека.
Але ў большасці сталічных кампаній, якія раней займаліся шоп-турамі ў Польшчу, інфармацыя на сайтах даўно не абнаўлялася, часта пазначана, што «тур адменены» або «тур плануецца».
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне12
Каментары