У Маскоўскім раёне добраўпарадкуюць яшчэ адну зону адпачынку. «Сад вершаў» з'явіцца ў межах вуліц Алібегава, Сапегі, Брыля і пр. Дзяржынскага, піша «Мінск-Навіны».
Рэалізацыя праекта «Сад вершаў» пачнецца сёлета. За два гады 43 гектары неўладкаванай тэрыторыі плануюць прывесці ў належны выгляд у адпаведнасці з праектнымі рашэннямі маладога архітэктара.
— Да выканання першых работ па праекце прыступім ужо ў другім квартале. Гэта будуць уваходная група, пешаходныя сувязі, усталяванне інфармацыйных стэндаў, таму што «Сад вершаў» прадугледжвае дадатковае інфармацыйнае напаўненне пра нашых беларускіх пісьменнікаў. Да Дня Незалежнасці мінчане ўжо змогуць наведваць пэўную частку зоны адпачынку, — распавялі ў адміністрацыі.
Уладальнікам Гран-пры гарадскога конкурсу моладзевых ініцыятыў «Мінская змена — 2024» стаў Уладзіслаў Кашкоўскі. Ён працуе тэхнікам-праекціроўшчыкам у «Мінскпраекце». Праект па добраўпарадкаванні зялёнай зоны хлопец выставіў на конкурс яшчэ ў 2023-м. Праз год ён прадставіў дапрацаваны «Сад вершаў», у якім улічыў пажаданні спецыялістаў — і перамог.
Рэалізоўваць праект будуць на ўчастку тэрыторыі, абмежаванай вуліцамі Алібегава, Л. Сапегі, Я. Брыля і праспектам Дзяржынскага. Добраўпарадкаваць яе — задача са зорачкай, бо на лакацыі са складаным рэльефам у дадатак размешчаны лініі электраперадачы, праходзяць воданапорныя сеткі і працякае ручай Мышка. «Сад вершаў» будзе ўключаць алею вершаў, зоны ціхага адпачынку, спартыўныя і дзіцячыя пляцоўкі. Асаблівую ўвагу нададуць стварэнню безбар'ернага асяроддзя, каб аб'ект маглі наведваць маламабільныя людзі.
Каментары