Прыпыненне польскім урадам права на падачу хадайніцтваў аб міжнароднай абароне на мяжы з Беларуссю і іншыя меры далі эфект. Колькасць спробаў парушэння мяжы мігрантамі зменшылася.
Аднак у МУС Польшчы чакаюць правакацый на мяжы з беларускага боку. Пра гэта ў эфіры TVPinfo заявіў намеснік міністра ўнутраных спраў і адміністрацыі Мацей Душчык, піша Reform.news.
Паводле яго слоў, у сакавіку з надыходам вясны на мяжы фіксавалася ад 100 да 200 спробаў парушэння мяжы. Аднак пасля завяршэння мерапрыемстваў па ўмацаванні памежнага загарожання, у тым ліку мадэрнізацыі сродкаў назірання, увядзення буфернай зоны і прыпынення права падачы хадайніцтва аб прытулку колькасць спробаў парушэння мяжы скарацілася.
«Калі мы параўнаем гэты перыяд у 2025 і 2024 годзе, то бачны гіганцкі прагрэс. У нас ёсць умацаваны плот, буферная зона, інфармацыйная кампанія ў краінах паходжання і транзіту, прыпыненне права на прытулку — усё гэта прывяло да таго, што мы маем ад 10 да 20 спробаў парушэння, але гэта значна менш, чым раней.
І што вельмі важна, за тры дні — субота, нядзеля, панядзелак — у нас стоадсоткавая эфектыўнасць затрыманняў. Ніхто не перайшоў мяжу, але спробы працягваюцца», — сказаў ён.
Намеснік міністра адзначыў, што польскі бок пры гэтым разглядае любыя сцэнары, у тым ліку новыя правакацыі на мяжы.
«Калі Лукашэнка, які прывёз гэтых людзей да сябе, сёння мае з імі праблемы, бо яны не могуць перайсці мяжу, верагодна, захоча зрабіць яшчэ нейкія правакацыі, адну, другую ці трэцюю, вельмі магчыма нават з ужываннем гвалту да гэтых мігрантаў. Але мы ведаем, як рэагаваць на такую сітуацыю, ведаем, што Лукашэнка хоча абвастрыць гэты канфлікт. Зараз ён б’ецца аб сцяну, бо плот узмоцнены. Усе гэтыя дзеянні, якія мы распачалі і якія сёння даюць вынік, азначаюць, што ён і яго расчараванне растуць», — сказаў ён.
Душчык не стаў канкрэтызаваць, якіх менавіта дзеянняў з беларускага боку чакаюць у МУС. Паводле яго слоў, гэта могуць быць пашкоджанні плота, атакі на пункт пропуску.
«Давайце ўспомнім, што адбылося некалькі дзён таму. Польскія камеры зафіксавалі напад беларускага служачага з камянямі на польскіх памежнікаў. Міністр Семоняк вельмі ясна сказаў, што правакацыі будуць расцэнены як варожыя, як варожы акт супраць нас, супраць Польшчы», — дадаў намеснік міністра.
У намесніка міністра таксама спыталі пра спробы пераправы мігрантаў праз памежны Буг, з якога былі выняты целы двух чалавек. Паводле Душчыка, мігрантаў штурхнулі ў ваду беларускія служачыя.
«Мы ведаем, што гэта людзі, якія, верагодна, паводле нашай інфармацыі, маніторынгу сітуацыі ў Беларусі, гэта былі людзі, якіх штурхнулі ў ваду беларускія службы, хутчэй за ўсё, у сярэдзіне сакавіка», — сказаў ён.
«Там было больш за 10 чалавек, іх штурхнулі ў ваду. Некаторых з іх удалося выратаваць. Польскія памежнікі, бачачы тых, хто тоне, вядома, аказалі ім дапамогу. Верагодна, не ўсім, не заўсёды гэта ўдаецца.
Некаторыя, верагодна, не ўмелі плаваць і, падобна, патанулі яшчэ на беларускай тэрыторыі, бо целы ўсплылі на нашай тэрыторыі. Чаму ўсплылі зараз? Бо трохі змянілася плынь ракі, было шмат дажджу, узровень вады падняўся і целы ўсплылі. Хацелася б, каб іх больш не было. Але, на жаль, гэта яшчэ адзін прыклад эскалацыі з другога боку», — дадаў ён.
Ён не выключыў, што целы маглі ўсплыць і на беларускай тэрыторыі.
Душчык падкрэсліў, што Польшча ў міграцыйным крызісе абараняецца.
«Польшча ў гэтым канфлікце абараняецца, Беларусь атакуе. Гэта можна сказаць вельмі выразна, і Беларусь будзе звяртацца да зусім розных сітуацый, напрыклад, спрабуючы дэстабілізаваць нас, бо дэстабілізацыя польска-беларускай мяжы — гэта дэстабілізацыя ўсяго Еўрапейскага Саюза», — сказаў намеснік міністра.
Адказваючы на пытанне пра магчымы рост колькасці спробаў фарсавання памежных рэк, Душчык адзначыў, што нейкай дынамікі тут не назіраецца. Мігранты і раней спрабавалі пераправіцца праз рэкі на надзіманых плытах. Пры гэтым, сённяшняя сістэма маніторынгу на мяжы дазваляе сачыць і за беларускім берагам. Польскія служачыя ведаюць, што адбываецца на беларускай тэрыторыі, мабілізуюць патрулі і накіроўваюць іх на месца патэнцыйнага парушэння.
«Мы проста ведаем, што нешта пачынае адбывацца на беларускай тэрыторыі, і тады мы мабілізуем сілы ў тым месцы, дзе гэтыя людзі хочуць перайсці мяжу. Што азначае прыпыненне права на прытулку? Гэта азначае, што тыя асобы, якія прыплылі на надзіманых лодках або нават уплаў, калі іх стан здароўя нармальны, яны абследаваныя, і калі няма ніякай рызыкі, што вяртанне іх на беларускую тэрыторыю наземным шляхам ім не пагражае, то гэта робіцца», — патлумачыў ён.
Мацей Душчык таксама заявіў, што польскаму боку вядома колькасць мігрантаў, якія знаходзяцца ў Беларусі, але адмовіўся яе назваць.
Паводле яго слоў, Польшча вядзе кампанію ў сацсетках, накіраваную на распаўсюд інфармацыі пра прыпыненне права на падачу хадайніцтва аб прытулку. Таксама ён быў у Егіпце, дзе абмяркоўваў з уладамі краіны магчымасць правядзення аналагічнай кампаніі.
Цяпер чытаюць
«Прачытайце яе гісторыю». Лукашэнку давялося апраўдвацца перад Пуціным за георгіеўскія стужкі6
Каментары