33-гадовы беларускі кікбаксёр-чэмпіён памёр ад рэдкай анкалогіі
Цімур Бураў быў шасціразовым чэмпіёнам Беларусі па муай-тай і тайскім боксе. «Адразу пайшоў у царкву, а ўжо потым — лячыцца. Запозна», — расказалі «Нашай Ніве» яго сябры.
Цімур Бураў — член нацыянальнай зборнай па тайскім боксе і кікбоксінгу (2009—2016), шматразовы фіналіст кубкаў свету і чэмпіянатаў Еўропы, чэмпіён Эстоніі і Латвіі, шасціразовы чэмпіён Беларусі па кікбоксінгу і тайскім боксе.
Гэта чалавек з зорнай плеяды беларускіх кікбаксёраў пачатку 2010-х. Многія з іх, дарэчы, такія, як Сяргей Скіба, Віталь Гуркоў, Яўген Лашэўскі ў выніку апынуліся ў эміграцыі.
Бураў памёр на мінулым тыдні ад рэдкай анкалогіі лімфатычнай сістэмы. З моманту пастаноўкі дыягназу прайшло троху больш за паўгода.
Аднаклубнікі хлопца журацца на ягоны падыход да дзеянняў пасля атрымання навіны.
«Адразу пайшоў у царкву, а ўжо потым — лячыцца. Запозна», — сказаў адзін з аднаклубнікаў Цімура.
Раней ад гэтай жа хваробы памерла малодшая сястра Бурава.
Бураў апошні час працаваў трэнерам. Даўно жанаты з Аленай Ляшкевіч, пяціразовай чэмпіёнкай свету па тайскім боксе.
* * *
Лімфатычная анкалогія — гэта рак, які паражае клеткі і тканкі лімфатычнай сістэмы, уключаючы лімфавузлы і селязёнку. Часцей за ўсё гаворка ідзе пра лімфому, якая можа працякаць як павольна, так і агрэсіўна. Важна памятаць, што ранняе выяўленне хваробы істотна павышае шанцы на паспяховае лячэнне.
Для прафілактыкі рэкамендуецца весці здаровы лад жыцця, падтрымліваць імунную сістэму і праходзіць рэгулярныя медыцынскія агляды.
Асаблівую ўвагу варта звяртаць на змены ў памерах лімфавузлоў, нязвыклую стомленасць або патлівасць ноччу.
Пры з’яўленні сімптомаў (неабавязкова звязаных з болем, але — нехарактэрных да таго) трэба неадкладна звяртацца да доктара і правярацца, нават калі ваш тэрапеўт не бачыць у гэтым сэнсу.
Іна Кулей: Мілінкевіч перамог смерць, але шлях да поўнага адужання няблізкі4
Каментары
Як правярацца, калі ты не маеш медычнай адукацыі і не ведаеш, якія табе патрэбныя абследаванні і аналізы? А паліклініка кажа, што "паказанняў" для тых абследаванняў, якія просіш ты, "няма". І не дае направленіе.
А Ірына Абельская праінспектавала ўсе паліклінікі і сказала, што ўсё правільна, так і трэба рабіць.
А потым людзі мруць ад рака ў 33 гады.