У Беларусі прадаюць рэдкі VW Polo. Колькі просяць за 30-гадовы эксклюзіў?
Шэраговы аўтааматар можа падумаць, што машыну проста сабралі з запчастак рознага колеру, але гэта не зусім так.
Цікавая машына, але з нюансамі
У Смалявічах выставілі на продаж рознакаляровы VW Polo 1996 года выпуску. У аб'яве пазначана, што гэта арыгінальны Арлекін (Harlekin).
Асаблівасць гэтай мадэлі заключаецца ў тым, што кузаў аўтамабіля быў выкананы адразу ў чатырох колерах: жоўты, сіні, чырвоны, зялёны.
У Polo, які прадаюць у Смалявічах, асноўны колер — сіні, таму дах, заднія крылы і ўнутранка аўто сіняе. Але колер кузава таксама можа быць жоўтым, чырвоным або зялёным.
У абіўцы сядзенняў таксама можна ўбачыць элементы з чатырох колераў. На рычагу пераключэння хуткасцей ёсць рознакаляровы надпіс Harlekin.
Просяць за машыну 2900 даляраў, што робіць яго самым дарагім на беларускім рынку сярод Polo 1995-1997 гадоў выпуску.
Наколькі каштоўны менавіта гэты экзэмпляр — пытанне спрэчнае. З аднаго боку гэта сапраўды рэдкае аўто, а з іншага, як кузаў так і салон аўто патрабуюць увагі.
Нават па фота, дзе машына стаіць брудная, бачна, што на многіх элементах кузава прысутнічае карозія.
Салон аўтамабіля таксама далёка не ў ідэальным стане. Ён патрабуе не толькі хімчысткі, але і рамонту, паколькі на крэслы кіроўцы ёсць дзірка.
Сапраўдны экслюзіў
VW Polo Harlekin выпускалі з 1995 па 1997 год. Усяго было выпушчана каля 3800 адзінак VW Polo Harlekin. Яшчэ больш рэдкім былі VW Golf 3 у выкананні Harlekin — усяго 264 штукі.
Адметна, што першапачаткова VW не меў планаў выпускаць падобныя версіі машын. Першапачаткова аўтавытворца зрабіў гэта дзеля рэкламы, але жартаўлівыя VW атрымалі пазітыўныя водгукі і высокі попыт, таму VW вырашыў выпусціць лімітаваную версію рознакаляровых машын.
У выніку Harlekin знайшоў сваё месца ў аўтамабільнай культуры. Аматары маркі ва ўсім свеце самастойна робяць з сваіх VW арлекінаў, замяняючы або перафарбоўвачы дэталі. І робяць гэта не толькі з мадэлямі Golf і Polo.
Такім чынам маркетынгавы трук стаў часткай аўтамабільнай культуры.
Што тычыцца тэхнічнага боку, то VW Polo Harlekin, як і Golf, нічым не адрозніваюцца ад іншых машын. Напрыклад, у смалявіцкага Polo пад капотам самы слабы ў лінейцы 1-літровы бензінавы рухавік.
Цяпер чытаюць
У віцэ-спікеркі Каардынацыйнай рады Лізаветы Пракопчык сабралася $12 тысяч даўгоў34
Каментары