Вярхоўны суд Еўрасаюза прыняў рашэнне, што Мальта павінна спыніць праграму так званых «залатых пашпартоў», якая дазваляе іншаземцам атрымаць грамадзянства краіны ў абмен на інвестыцыі, паведамляе Reuters.
Схема прадугледжвае атрыманне мальтыйскага пашпарта за інвестыцыю ў памеры 1 мільёна еўра, што дае права свабоднага пражывання ва ўсіх краінах Еўрасаюза.
Суд у абгрунтаванні зазначыў, што хоць членскія дзяржавы ЕС самі вызначаюць, як і каму даваць грамадзянства, але такая практыка супярэчыць даверу паміж краінамі еўрасупольнасці і робіць набыццё грамадзянства «чыста камерцыйнай здзелкай».
Членская краіна Еўрасаюза не можа надаваць сваё грамадзянства, а значыць, і грамадзянства ЕС у абмен на фінансавыя выгоды, гаворыцца ў рашэнні суда.
Вярхоўны суд ЕС мяркуе, што праграма выдачы «залатых пашпартоў» парушае салідарнасць і давер паміж дзяржавай ды грамадзянінам, а таксама паміж членскімі краінамі Еўрасаюза.
Пасля нападу Расіі на Украіну Мальта прыпыніла праграму «залатых пашпартоў» для грамадзян Расіі і Беларусі, але працягвала надаваць грамадзянства прадстаўнікам іншых нацыянальнасцяў.
Раней паведамлялася, што ўладальнікамі мальтыйскіх пашпартоў сталі ў тым ліку расійскія чыноўнікі і бізнэсмены, звязаныя з крамлёўскім рэжымам.
Каментары