У новым сусветным рэйтынгу пашпартоў перамагла Ірландыя, а Беларусь на 125-м месцы
Кансалтынгавая кампанія ў сферы падаткаў і іміграцыі Nomad Capitalist апублікавала свой штогадовы рэйтынг «самых моцных пашпартоў». Яго адрозненне ад большасці падобных даследаванняў у тым, што акрамя магчымасці бязвізавага ўезду ў іншыя краіны, ён улічвае шмат іншых важных параметраў, піша CNBC.
Дзявятае выданне рэйтынгу ўключае 199 краін і тэрыторый, пры яго складанні выкарыстоўваліся 20 крыніц — ад матэрыялаў падатковых службаў да World Happiness Report і Індэксу чалавечага развіцця ААН.
У адрозненне ад іншых рэйтынгаў, што ацэньваюць пашпарты толькі па колькасці краін з бязвізавым уездам, Nomad Capitalist улічвае пяць крытэрыяў:
- Бязвізавы рэжым — 50%;
- Падаткаабкладанне — 20%;
- Глабальнае ўспрыманне краіны ў свеце — 10%;
- Магчымасць атрымання двайнога грамадзянства — 10%;
- Асабістыя свабоды (свабода прэсы, вайсковы абавязак і г.д.) — 10%.
Гэтыя фактары дапамагаюць лепш зразумець «сапраўдную вартасць» грамадзянства і вызначыць, людзям з якой краіны, валодаючы адпаведным пашпартам, сапраўды жывецца ва ўсіх сэнсах камфортна.
Згодна з гэтым рэйтынгам, самы моцны пашпарт у свеце мае Ірландыя.
Гэтая краіна ўпершыню заняла першае месца ў штогадовым рэйтынгу ад Nomad Capitalist. Яшчэ ў 2020 годзе яна падзяліла лідарства з Люксембургам і Швецыяй.
«Ірландыя здзівіла ўсіх сваёй моцнай міжнароднай рэпутацыяй, дружалюбнай да бізнэсу падатковай палітыкай і гнуткасцю грамадзянства», — сказаў даследчык кампаніі Хаўер Карэа для CNBC Travel.
Наступныя месцы следам за Ірландыяй займаюць таксама еўрапейскія краіны: Швейцарыя, Грэцыя, Партугалія, Чэхія, Фінляндыя, Люксембург, Нідэрланды, Мальта. І толькі дзясятую пазіцыю дзеляць паміж сабой нееўрапейскія дзяржавы — Аб'яднаныя Арабскія Эміраты і Новая Зеландыя.
Беларусь у спісе знаходзіцца на далёкім 125-м месцы, далёка адстаючы ад усіх сваіх суседзяў. Латвія тут на 19-м месцы, Літва — на 29-м, Польшча — на 32-м, Украіна — на 73-м, а Расія — на 95-м.
Замыкаюць сусветны рэйтынг такія краіны, як Пакістан, Ірак, Эрытрэя, Емен і Афганістан.
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?11
«Галоўнае не забываць падзараджаць не толькі тэлефон, але і сябе самога». Як украінскі вайсковец жыве з двума электрастымулятарамі. І што ў яго з сэксам?1
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе99
Каментары