У беларуса, што некалькі дзён таму з пагоняй затрымлівалі ў цэнтры Варшавы, знайшлі кілаграмы наркотыкаў
4 мая польскія медыі паведамілі пра затрыманне ў цэнтры варшаўскай сталіцы беларуса на BMW. Сёння tvn24.pl паведаміла падрабязнасці той гісторыі.
Ноччу 3 мая паліцэйскія ўмяшаліся ў сітуацыю з кіроўцам BMW на пляцы Трох Крыжоў. Іх увагу прыцягнуў яго агрэсіўны стыль кіравання аўто. Калі яны загадалі яму спыніцца для праверкі, мужчына пачаў ўцякаць. Да пераследу далучыліся ўсе паліцэйскія, якія былі паблізу, — расказаў Якуб Пацыняк, прэс-сакратар Раённай камендатуры паліцыі Варшава I.
На вуліцы Брацкай кіроўца ўдарыўся ў бетонныя лаўкі, пасля чаго пакінуў аўто і працягваў уцякаць пешшу. Праз некалькі дзясяткаў метраў ён быў затрыманы паліцэйскімі. Гэтыя ж супрацоўнікі знайшлі ў ягоным аўтамабілі значную колькасць наркотыкаў. Відавочна, менавіта таму падазраваны не спыніўся для дарожнай праверкі. Гэта 37-гадовы грамадзянін Беларусі, які неаднаразова быў у полі зроку праваахоўнікаў, — дадае прэс-сакратар.
Мужчыну даставілі ў камендатуру. Яго праверылі спецыяльным тэстарам на наяўнасць наркатычных рэчываў у арганізме. Высветлілася, што ён быў пад уздзеяннем амфетаміну і какаіну, што сам і пацвердзіў. У бальніцы ў яго ўзялі кроў для далейшага дэталёвага аналізу.
Да справы далучыліся крыміналісты з аператыўна-разведвальнага аддзела камендатуры, якія займаюцца барацьбой з наркатычнай злачыннасцю. Паводле іх звестак, затрыманы жыў разам з 27-гадовай грамадзянкай Украіны.
Калі паліцэйскія прыехалі да пары на вуліцу Канапніцкай, яны заўважылі жанчыну перад домам, якая сядала ў Mercedes.
— Яны правялі ў дачыненні да яе аператыўныя дзеянні і ў яе сумачцы знайшлі какаін і марыхуану. Далейшыя дзеянні праводзіліся ў кватэры, якую падазраваная не хацела добраахвотна адчыніць. Паліцэйскія выклікалі на месца ратавальнікаў, якія дапамаглі трапіць усярэдзіну. У вентыляцыйным канале былі знойдзеныя поліэтыленавыя пакеты з наркотыкамі, — расказаў прэс-сакратар.
Агулам па гэтай справе было канфіскавана амаль тры кілаграмы розных наркотыкаў: какаін, амфетамін, метамфетамін, мефедрон, галюцынагенныя грыбы, марыхуана і таблеткі MDMA. У паведамленні адзначаецца, што паліцыя таксама канфіскавала газавы пісталет, грошы, мабільныя тэлефоны і ювелірныя вагі.
— 37-гадовы мужчына атрымаў абвінавачанне ў нежаданні спыніцца на дарожную праверку і валоданні значнай колькасцю наркотыкаў. У сваю чаргу яго 27-гадовай партнёрцы таксама былі выстаўленыя абвінавачанні ў валоданні значнай колькасцю забароненых рэчываў, — адзначае Пацыняк.
Суд задаволіў хадайніцтва пракуратуры і прызначыў абодвум падазраваным часовы арышт тэрмінам на тры месяцы.
Ім абодвум пагражае да 10 гадоў пазбаўлення волі.
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары