У Парыжы асудзілі банду «дзядоў-грабежнікаў», якія абакралі Кім Кардаш'ян. Усе яны выйшлі на волю
Суд у Парыжы вынес абвінаваўчы прысуд бандзе рабаўнікоў, якая скрала каштоўнасці на суму 10 млн даляраў у зоркі рэаліці-шоу Кім Кардаш'ян у парыжскім гатэлі ў 2016 годзе, піша Бі-бі-сі.
Напад адбыўся ў ноч на 4 кастрычніка 2016 года ў Hotel de Pourtales у цэнтры Парыжа, дзе спынілася амерыканка. Мужчыны праніклі ў яе нумар, звязалі Кардаш'ян і выкралі каштоўнасці, сярод якіх быў брыльянтавы пярсцёнак, падораны былым мужам, рэперам Канье Уэстам.
Большасць выкрадзеных каштоўнасцяў так і не былі знойдзена.
Перад судом паўсталі дзевяць мужчын і адна жанчына. Самае суровае пакаранне атрымаў верхавод банды Аамар Аіт Кедаш, якому на момант рабавання было 69 гадоў — яго прысудзілі да трох гадоў зняволення і пяці ўмоўна, аднак з улікам ужо адбытага тэрміну ён не вернецца ў турму, як і ўсе астатнія асуджаныя.
Прысуды аказаліся больш мяккімі, чым таго патрабавала абвінавачванне.
«Я разумею, што вы ўсведамляеце, што прычынілі шкоду», — заявіў суддзя Давід Дэ Па, зачытваючы прысуды.
Паводле яго слоў, «стан здароўя абвінавачаных не дазваляе пазбаўляць каго-небудзь з іх волі». «Было б несправядліва адправіць вас у турму сёння ўвечары», — сказаў ён.
Аамар Аіт Кедаш па мянушцы «Стары Амар», які амаль страціў слых і магчымасць гаварыць за час працэсу, праз адваката папрасіў прабачэння ў апошнім слове перад вынясеннем прысуду.
«Не магу знайсці слоў. Мне вельмі шкада», — гаворыцца ў яго заяве.
Дваіх абвінавачаных, якіх пракуратура называла інфарматарамі рабаўнікоў, прысяжныя ў выніку апраўдалі, не палічыўшы доказы іх віны дастаткова пераканаўчымі.
«Гэта злачынства стала самым страшным вопытам у маім жыцці і аказала велізарны ўплыў на мяне і маю сям'ю», — гаворыцца ў заяве Кардаш'ян, якая была распаўсюджана пасля вынясення прысуду.
У пятніцу раніцай кожны з абвінавачаных выступіў у судзе з апошнім словам, пасля чаго прысяжныя адышлі на нараду, якая расцягнулася больш чым на 10 гадзін, да глыбокага вечара.
Чацвёра мужчын, якія непасрэдна ўдзельнічалі ў аперацыі, абвінавачваліся ў здзяйсненні ўзброенага рабавання, за якое ў Францыі караюць пазбаўленнем волі на тэрмін да 10 гадоў — і менавіта столькі прасіў бок абвінавачвання.
Іншыя абвінавачваліся толькі ў розных формах саўдзелу ў злачынстве, аднак і для іх пракуроры прасілі ад шасці да васьмі гадоў.
У выніку, нягледзячы на тое што ўсе падсудныя былі вызваленыя ў зале суда, большасці з іх усё ж былі фармальна вынесеныя рэальныя тэрміны.
Аамар Аіт Кедаш быў прызнаны арганізатарам злачынства і прысуджаны да васьмі гадоў пазбаўлення волі (з іх пяць умоўна) і выплаце штрафу 5 тысяч еўра.
За час, пакуль доўжыўся суд, галоўны абвінавачаны амаль страціў слых і магчымасць гаварыць. Яго галоўны саўдзельнік Юніс Абас, які прызнаў сваю віну (у гатэлі, калі рабаўнікі падняліся ў нумар Кардаш'ян, ён застаўся вартаваць у холе), атрымаў на год менш — сем гадоў (пяць з якіх таксама ўмоўна).
У 2021 годзе, калі ўжо ішло судовае разбіральніцтва, Абас паспрабаваў зарабіць на злачынстве, апублікаваў кнігу «Я выкраў Кім Кардаш'ян», у якой распавёў пра напад са свайго пункту гледжання.
Дакладна такі ж тэрмін-сем гадоў, з ні пяць умоўна — суд прызначыў і яшчэ двум абвінавачаным.
Першы — пенсіянер Дзідбэ Дзюбрэ, які з самага пачатку цалкам адмаўляў сваю віну (абвінавачванне сцвярджала, што менавіта ён звязваў тэлезорку) і якога журналісты празвалі «блакітныя вочы».
Другі— Марк-Аляксандр Бае, самы юны з падсудных (на момант рабавання яму было 25 гадоў), таксама заяўляў аб сваёй невінаватасці. У гатэлі ён разам з Юнісам Абасам застаўся дзяжурыць у холе.
Сын Кедаша, які сыграў у той дзень для бацькі і яго кампаньёнаў ролю кіроўцы, атрымаў пяць гадоў турмы (з іх чатыры ўмоўна). З самага пачатку працэсу ён запэўніваў, што нават не падазраваў, што бярэ ўдзел у злачынстве, але пераканаць у гэтым прысяжных яму не ўдалося.
Адзіная жанчына на лаве падсудных — 80-гадовая Крысціяна Глотэн, якая забяспечвала выканаўцам рабавання сувязь адзін з адным — атрымала чатырохгадовы ўмоўны тэрмін.
Франсуа Дэлапорт, які вырабіў для рабаўнікоў падробленыя дакументы, атрымаў тры гады ўмоўна. А Марк Бае (бацька іншага абвінавачанага, Марка-Аляксандра), якога абвінавачвалі толькі ў незаконным захоўванні зброі, прысуджаны да штрафу ў памеры 5 тысяч еўра.
Цяпер чытаюць
Што вядома пра жанчыну, якая загінула ў аўтобусе, што вёз беларускіх футбалістаў-школьнікаў у Геленджык?18
Каментары