У Мінску ўзброеныя сілавікі затрымалі індывідуальнага прадпрымальніка
Яго падазраюць у махлярстве са страхавымі кампаніямі
Аператыўнікі 10-га ўпраўлення (па Мінскай вобласці) ГУБАЗіК пры сілавой падтрымцы атрада спецыяльнага прызначэння «Рысь» унутраных войскаў у сталіцы затрымалі 39-гадовага індывідуальнага прадпрымальніка, паведамляе прэс-служба МУС.
Мужчына ў лютым звярнуўся ў страхавую кампанію з наўмысна ілжывымі звесткамі аб угоне на тэрыторыі Расійскай Федэрацыі раней застрахаванага прэміяльнага аўтамабіля Audi, які знаходзіцца ў лізінгу. Ён ашуканскім шляхам спрабаваў атрымаць кампенсацыю шкоды 35 тысяч даляраў. Аднак высветлілася, што факту ўгона не было. Мужчына прадаў аўтамабіль трэцім асобам для яго разборкі.
Указаны выпадак не адзіны. Махляр выкарыстоўваў падобныя схемы махінацый са страхавымі і лізінгавымі кампаніямі Беларусі на працягу апошніх некалькіх гадоў.
Падчас правядзення ператрусаў знойдзена і канфіскавана 7 мабільных тэлефонаў, ноўтбук, 5 банкаўскіх карт, а таксама розная дакументацыя. Наложаны арышт на маёмасць злачынца.
Заведзена крымінальная справа за спробу махлярства, здзейсненага ў асабліва буйным памеры. Фігуранту пагражае да 12 гадоў пазбаўлення волі.
Каментары