Лукашэнка на прыняцці грамат паслоў казаў пра «выключнасць некаторых еўрапейскіх палітыкаў»
Зярняты ідэй пра нейкую «выключнасць», прэтэнзіі на «ісціну ў апошняй інстанцыі» зноў далі парасткі ў розумах шэрагу палітыкаў. Пра гэта заявіў Аляксандр Лукашэнка, прымаючы даверчыя граматы паслоў замежных дзяржаў, піша БелТА.
Звяртаючыся да дыпламатаў, ён адзначыў, што гэтая сустрэча адбываецца паміж дзвюма знакавымі, але процілеглымі па сваёй сутнасці датамі — Міжнародным днём міру, які адзначаецца 21 верасня, і 86-й гадавінай пачатку Другой сусветнай вайны — 1 верасня.
«Другое здарэнне я не ўзгадваў бы ў гэты ўрачысты момант, калі б не ўзмацненне аналогій паміж цяперашнімі трывожнымі тэндэнцыямі і падзеямі 30-х гадоў мінулага стагоддзя, якія прывялі да трагічных наступстваў для ўсёй планеты, у тым ліку і для Беларусі», — сказаў Аляксандр Лукашэнка.
«На жаль, зярняты ідэй пра нейкую «выключнасць», прэтэнзіі на «ісціну ў апошняй інстанцыі» зноў далі парасткі ў розумах шэрагу палітыкаў — заходніх і празаходніх», — канстатаваў ён.
«Паўтор гісторыі ў выглядзе будаўніцтва пасярод Еўропы рэальнай «жалезнай заслоны» быў бы фарсам, калі б не санкцыйная вайна і імклівая мілітарызацыя краін Еўрапейскага саюза».
Аляксандр Лукашэнка падкрэсліў, што гэтыя працэсы адсунулі нават не на другі, а на пяты план сапраўды важныя і глабальныя праблемы: харчовай, энергетычнай, кліматычнай і экалагічнай бяспекі, ліквідацыі прычын беднасці, няроўнасці, неэфектыўнага кіравання рэсурсамі.
«Пра гэта, а таксама іншыя сістэмныя праблемы, у тым ліку пра павышэнне ролі і эфектыўнасці ААН, новыя падыходы да глабальнага кіравання, цяпер гавораць не ў Еўропе, а на іншых пляцоўках», — сказаў ён.
У сувязі з гэтым ён нагадаў пра нядаўні саміт ШАС у Цяньцзіні, віртуальную сустрэчу БРІКС, мерапрыемства афрыканскіх міждзяржаўных аб’яднанняў.
«У асобе Беларусі вы знойдзеце адказнага партнёра для працы як па гэтым, так і па двухбаковым парадку дня», — запэўніў ён.
Цяпер чытаюць
Дзевяць чалавек памерлі ў Брэсце і Мінску — усім ім уводзілі адныя і тыя ж лекі. У прэпараце знайшлі бактэрыі5
Каментары