Арыштавалі мінчука, які 27 гадоў таму зарэзаў маладую валютчыцу. Яго здаў падзельнік, які цяпер сядзіць на пажыццёвым
Забойцу на той момант было 15 гадоў.
Следчы камітэт расказаў пра раскрыццё забойства, якое адбылося ў Мінску ў студзені 1999 года.
Паводле слоў старэйшага следчага з упраўлення УСК па Мінску Аляксандра Маркевіча,
загінулая 20‑гадовая мінчанка здымала кватэру ў адным з дамоў на праспекце Газеты «Известия» (у 2005 годзе яго перайменавалі ў праспект Газеты «Звязда»).
Дзяўчына займалася нелегальным абменам валюты і рэгулярна насіла ў сумцы вялікія сумы.
За ёй сачыла кампанія мясцовых хлопцаў, якім было 15, 17 і 22 гады. «Яны вылічылі яе звычкі, вывучылі маршрут», — кажа Маркевіч.
16 студзеня 1999 года каля 19:00 нападнікі зайшлі за дзяўчынай у пад'езд. На лесвічным маршы 22‑гадовы і 17‑гадовы паспрабавалі вырваць у яе сумку. Дзяўчына пачала крычаць і клікаць на дапамогу. Тады 15-гадовы, баючыся, што на шум збягуцца суседзі, без дамоўленасці з астатнімі дастаў нож і нанёс ёй больш за 20 удараў. Двое іншых, паводле следчага, у самім забойстве ўдзелу не бралі.
Дзяўчына змагла выбрацца з пад'езда і ўпала на вуліцы ў некалькіх метрах ад уваходу. Там яе і знайшлі. Тады злачынства раскрыць не ўдалося.
Справу аднавілі ў 2026 годзе пасля таго, як адзін з удзельнікаў — той, каму ў 1999‑м было 17 гадоў, — сам прызнаўся. На той момант ён ужо адбываў пажыццёвае зняволенне за іншае злачынства — патройнае забойства.
Двух іншых затрымалі пазней. Старэйшы жыў у Магілёве.
Малодшы, які і нанёс удары нажом, працаваў дальнабойшчыкам і быў у рэйсе, таму яго давялося чакаць, пакуль ён вернецца ў Беларусь.
Спачатку абодва адмаўлялі віну, але потым прызналіся.
Адметна, што абодва раней сядзелі за іншыя забойствы.
Паводле СК, у групе быў адзін прыезджы: старэйшы ў 1990‑я пераехаў у Мінск з Магілёва. Двое іншых выраслі ў суседніх пад'ездах, а сярэдні пазнаёміўся з прыезджым і паклікаў яго ў кампанію. Лідарам трыа, паводле следчага, быў малодшы — «агрэсіўнасцю і напорыстасцю характару».
Што пагражае забойцы, пакуль невядома. З улікам таго, што яму на момант злачынства было 15 гадоў, а судзіць яго будуць па старым Крымінальным кодэксе, хутчэй за ўсё, максімальны тэрмін для яго — 10 гадоў зняволення.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку6363
Каментары