Знакаміты міланскі стадыён «Сан-Сіра» будзе знесены. Такое рашэнне прыняла гарадская рада Мілана, якая пасля працяглых дыскусій ухваліла продаж арэны футбольным клубам «Мілан» і «Інтэр», піша Euronews.
Абодва клубы маюць намер на месцы 99‑гадовага стадыёна пабудаваць новую сучасную арэну на 71,5 тысячы месцаў. Кошт праекта складае каля 1,2 мільярда еўра.
Гарадскія ўлады прагаласавалі за продаж стадыёна і навакольных тэрыторый за 197 мільёнаў еўра (24 галасы «за» і 20 «супраць»). Абмяркоўвалі пытанне амаль 12 гадзін. «Мілан» і «Інтэр» нават папярэджвалі, што могуць перанесці будаўніцтва за межы горада, калі план не атрымае ўхвалення.
У сумеснай заяве клубы назвалі гэтае рашэнне «гістарычным крокам для будучыні камандаў і горада» і падкрэслілі, што новы стадыён будзе адпавядаць міжнародным стандартам.
Разам з тым у Італіі ўзнікаюць спрэчкі: частка грамадскасці хацела б захаваць легендарны стадыён, а журналісты выказваюць асцярогі, што ўладальнікі-карпарацыі могуць у будучыні атрымаць прыбытак з продажу зямлі.
Да 10 лістапада здзелка павінна быць завершаная, а другі ярус «Сан-Сіра», які існуе ўжо 70 гадоў, атрымае ахоўны статус як гістарычны аб’ект. Паводле плана, каля 90% арэны будзе знесена, але гэты гістарычны фрагмент застанецца.
Праектаваць новую арэну будуць архітэктурныя бюро Foster + Partners і Manica. Будоўля стане часткай маштабнай гарадской рэканструкцыі плошчай 281 тысяча квадратных метраў.
Новы стадыён плануецца адкрыць да Еўра-2032, які Італія будзе прымаць разам з Турцыяй.
Стадыён «Сан-Сіра», пабудаваны ў 1925 годзе, з’яўляецца найбуйнейшым у Італіі (80 тысяч месцаў). Ён яшчэ паспее прыняць цырымонію адкрыцця Зімовых Алімпійскіх гульняў 2026 года.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку27
Каментары