Апошнім часам у вёсках і гарадах заўважаюць незвычайных гасцей — маладых ліс. Жывёлы спакойна разгульваюць паміж участкаў, заглядваюць у смеццевыя бакі і зусім не баяцца людзей. Ці варта біць трывогу і як сябе паводзіць пры сустрэчы з дзікім зверам? На прыкладзе Дзяржынскага раёна разам са спецыялістамі разбіралася «Узвышша».
У рэдакцыю паступіў званок з садовага таварыства «Пагранічнік», што знаходзіцца недалёка ад Дзяржынска.
— Мяне непакоіць адна праблема. У нас па тэрыторыі ходзіць ліса. Старшыня нашая тэлефанавала ў МНС і РАУС. Адправілі куды далей — а менавіта ў паляўнічую гаспадарку. Там наогул адказалі, каб мы не перажывалі. Гэта ўвогуле што такое? — абураюцца члены СТ.
Сезон цікаўнасці: чаму лісы прыходзяць да людзей?
Як растлумачылі спецыялісты, тое, што адбываецца, — сезонная і абсалютна нармальная з'ява. Цяпер у новага патомства лісянят пачынаецца перыяд самастойнасці: яны ўжо адышлі ад маці, але яшчэ не навучыліся баяцца чалавека.
— Яны падобныя на маленькіх дзяцей, якіх упершыню выпусцілі ў вялікі свет, — праводзіць аналогію кіраўнік паляўнічай гаспадаркі Аляксандр Ціханаў. — Цікаўныя, але не разумеюць небяспекі, таму ідуць да людзей. У дадзеным выпадку жывёла нават не зацікаўлена ў здабычы, не чапае хатнюю птушку.
Важна ведаць:
- такія паводзіны не сведчаць пра хваробу жывёлы;
- лісы не ўяўляюць прамой пагрозы для людзей;
- насцярожыцца варта толькі ў тым выпадку, калі ліса праяўляе нехарактэрныя паводзіны, напрыклад, вельмі агрэсіўная.
Калі сітуацыя нармалізуецца?
Праблема вырашыцца натуральным шляхам з 1 лістапада — афіцыйным адкрыццём сезона палявання. Маладыя лісы, сутыкнуўшыся з небяспекай, хутка навучацца пазбягаць людзей і будуць трымацца далей ад населеных пунктаў.
— Ліса, як воўк ці янотападобны сабака, адносіцца да шкоднага віду жывёл, і мы штогод арганізуем яе здабычу, — адзначае спецыяліст.
Калі ўсё ж варта біць трывогу?
Прыкметы сапраўднага шаленства, якое часцей выяўляецца летам, кардынальна адрозніваюцца ад паводзін цікаўных лісянят.
Хворая жывёла, як правіла, паводзіць сябе неадэкватна: назіраецца слінацёк, агрэсія, парушэнне каардынацыі рухаў. Здаровае ж лісяня проста выглядае «мілым і цікаўным».
Калі падключаць службы?
Выклік спецыяльных службаў (МНС або РАУС) неабходны, калі жывёла ўяўляе небяспеку для здароўя і жыцця чалавека або яму патрабуецца дапамога (збіта, траўміравана і г.д.). У раённых выканаўчых і распарадчых органах працуюць спецыяльныя камісіі, якія выязджаюць на месца і прымаюць рашэнне па далейшым рэагаванні.
У выпадку з СТ «Пагранічнік» людзі настойваюць на адстрэле лісы. Але выкарыстанне зброі ў населеным пункце забаронена заканадаўча.
— Не дазваляецца весці стральбу і знаходзіцца з зараджанай паляўнічай зброяй на адлегласці менш за 200 метраў ад крайняга будынка населенага пункта, — падкрэслівае Аляксандр Ціханаў. — Таксама весці стральбу ў напрамку людзей або населеных пунктаў, сельскагаспадарчых жывёл, транспартных сродкаў з агнястрэльнай гладкаствольнай паляўнічай зброі на адлегласці менш за 500 метраў да іх.
Агульная адказнасць
У інспекцыі прыродных рэсурсаў і аховы навакольнага асяроддзя адзначаюць, што самы надзейны спосаб пазбегнуць падобных сустрэч — абараніць свой падворак з дапамогай агароджы. Дарэчы, гэтага патрабуюць і ветэрынарныя правілы. Агароджу лепш зрабіць з металічнай сеткі, а каб пазбегнуць падкопу, яе варта добра заглыбіць. І затым рэгулярна правяраць цэласнасць як агароджы, так і гаспадарчых пабудоў.
З'яўленне ліс у садах і вёсках восенню — часовая і натуральная з'ява. Захоўвайце спакой, не правакуйце жывёл, і неўзабаве, з пачаткам паляўнічага сезона, яны навучацца захоўваць дыстанцыю. Ні ў якім разе не спрабуйце карміць ліс, ёсць рызыка завесці сабе нечаканага хатняга гадаванца, раяць спецыялісты.
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек44
Каментары
-----------------------
Это вы специайлисты относитесь да шкоднага виду живел. А лисы и волки то натурально.