Колькасць бюджэтных месцаў на магістратуры будзе вызначаць дзяржава
Раней універсітэты самі фарміравалі план набору на магістратуру, але цяпер, як паведаміў міністр адукацыі Андрэй Іванец, гэтым будзе займацца дзяржава. Яго словы перадае БелТа.
Іванец патлумачыў гэта тым, што падрыхтоўка спецыялістаў павінна адпавядаць мэтам краіны і грамадства.
«Калі раней ВНУ фармавалі колькасць бюджэтных месцаў у магістратуры і пералік спецыяльнасцяў, зыходзячы са свайго бачання, то цяпер сітуацыя зменіцца. Колькасць бюджэтных месцаў будзе залежаць ад запыту на пэўных спецыялістаў», — сказаў ён.
Правілы прыёму на платную форму магістратуры не зменяцца, у тым ліку для замежнікаў.
Але новы падыход будзе і да набору на аспірантуру. Цяпер туды можна будзе паступіць без скончанай магістратуры.
«Гаворка ідзе пра тое, што тыя хлопцы і дзяўчаты, якія зацікаўлены займацца навуковай, навукова-даследчай дзейнасцю, павінны мець магчымасць прыходзіць у аспірантуру без заканчэння магістратуры. І ў сувязі з гэтым кожны ўніверсітэт і вучоныя саветы павінны бачыць такіх маладых людзей і выдаваць адпаведныя рэкамендацыі», — сказаў Іванец.
Каментары
[Зрэдагавана]