Дарадца прэзідэнта Літвы не бачыць сэнсу ў перамовах з Беларуссю на ўзроўні МЗС
Праз перавозчыкаў, якія захраслі на мяжы, у аўторак маюць адбыцца тэхнічныя кантакты з беларускім бокам, кажа галоўны дарадца прэзідэнта Наўседы Дэйвідас Матулёніс.
«Гэта ў асноўным праблема, створаная рэжымам Лукашэнкі. Фуры ўзятыя ў закладнікі, і цяпер прапануецца весці перамовы, таму мне гэтае паняцце — перамовы — таксама не падабаецца. Заўтра, хутчэй за ўсё, будуць тэхнічныя кантакты з беларускім бокам. Мы маем сваё бачанне, прадставім сваё бачанне і паглядзім, як яны адрэагуюць, і калі ўсё сапраўды будзе выглядаць дастаткова добразычліва, я яшчэ раз паўтару: ніхто спецыяльна не зацікаўлены працягваць гэтае закрыццё пунктаў перасячэння мяжы», — LRT radio заявіў Д. Матулёніс.
Як паведамлялася, калі Літва гаворыць пра тэхнічны ўзровень перамоваў, Мінск імкнецца перавесці іх на больш высокі ўзровень — Аляксандр Лукашэнка хоча, каб вялі перамовы міністры замежных спраў.
У сваю чаргу Д. Матулёніс сцвярджае, што падстаў праводзіць перамовы на ўзровень Міністэрства замежных спраў не бачыць, бо перш за ўсё трэба дачакацца вынікаў тэхнічнай сустрэчы. «Чаму мы павінны пераходзіць на ўзровень замежных спраў? Мы маем канкрэтную праблему, яе трэба вырашыць — і ўсё стане на свае месцы. Цяпер спрабуюць абрастаць усялякімі новымі праблемамі, нібыта мы ў нечым вінаватыя, паказваючы, што тут невядома з якой прычыны Літва закрыла пункты перасячэння мяжы — другі бок цудоўна ведае, чаму яны былі закрытыя. Усё можна было вырашыць на працягу некалькіх дзён, але гэтага зроблена не было», — сказаў дарадца прэзідэнта.
«На тым баку, на Усходзе, часта бывае так, што ствараецца праблема, а потым прапануецца яе вырашаць. Гэта крыху нагадвае пэўную дзейнасць, з выкарыстаннем пэўных рычагоў, з мэтай дамагацца перамоваў, але на сёння я не бачу патрэбы ісці ў нейкія далейшыя перамовы. Так, яны будуць заўтра, паглядзім, як усё будзе выглядаць, і тады наш урад прыме найбольш разумнае рашэнне», — сказаў ён.
У канцы кастрычніка Літва закрыла мяжу з Беларуссю да канца лістапада, у Беларусі захраслі больш за тысячу літоўскіх фур.
Прэм'ер Літвы пра фуры ў Беларусі: Бізнэс павінен быў да гэтага падрыхтавацца
Літоўскія перавозчыкі наракаюць на гіганцкія выплаты, якія з іх здзерлі ў Беларусі
Уладзіслаў Кандратовіч: «Лукашэнка з літоўскімі фурамі абышоўся як рэкецір»
У Вільні перавозчыкі зладзілі ціхую акцыю ў сувязі з блакаваннем літоўскіх фур у Беларусі
Каментары
Литва уже куда-то переместилась с севера Беларуси?