Як Ігналінская АЭС безвынікова спрабавала прадаць нявыкарыстанае ядзернае паліва

Адмова Францыі

Дарадца групы па ядзернай энергетычнай палітыцы Міністэрства энергетыкі Літвы Патрыцыя Цэйко кажа, што станцыя прапанавала прадаць нявыкарыстанае паліва на перапрацоўку французскай кампаніі, але тая адмовілася яго купляць.

«Мы звярнуліся да адной з самых перадавых кампаній, французскай, якая магла б гэтым заняцца [перапрацоўкай ядзернага паліва]. Французы вельмі выразна сказалі «не», адмовіліся прыняць гэтае паліва, перапрацоўка паліва АЭС для іх занадта дарагая. Паліва вырабляецца для кожнага рэактара па асобнай рэцэптуры, і адказ быў такім: тое, што выраблена для Ігналінскай АЭС, не падыходзіць па складзе для перапрацоўкі гэтага паліва ў Францыі», — сказала Цэйко на пасяджэнні Камітэта па аўдыце Сейма ў сераду.

Кіраўнік ІАЭС Лінас Баўжыс сказаў BNS, што

калі б французская кампанія ўзяла паліва на перапрацоўку, то яго выкарыстоўвала б сама Францыя, але ўсе радыеактыўныя адкіды, якія засталіся пасля перапрацоўкі, былі б вернутыя Літве.

Перамовы з Расіяй

Па словах Цэйко, з Расіяй таксама вяліся перамовы пра бясплатную перадачу нявыкарыстанага паліва, аднак гэтыя перамовы спыніліся, калі Расія пачала поўнамаштабнае ўварванне ва Украіну ў 2022 годзе.

Пазней Цэйко патлумачыла, што спачатку яны хацелі прадаць нявыкарыстанае паліва Расіі, але калі яна не пагадзілася яго купіць, былі праведзены перамовы пра яго бясплатную перадачу.

«Былі спробы перадаць [нявыкарыстанае] паліва Расіі нават бясплатна, таму што гэта было б выгадна і нам (…), і была дасягнута дамоўленасць. Узгадняліся схемы транспарціроўкі гэтага нявыкарыстанага ядзернага паліва на тэрыторыю Расіі. Мы вялі перамовы з Латвіяй, паколькі гэты груз павінен суправаджацца ўзброеным эскортам. Усё гэта рабілася з Міністэрствам замежных спраў, але ўсё спынілася, таму што пачалася вайна ва Украіне», — сказала Цэйко на пасяджэнні камітэта.

Прэс-сакратар ІАЭС Ёліта Мажэйкене паведаміла, што на станцыі знаходзіцца 2,4 тысяч тон адпрацаванага паліва, а нявыкарыстанага — усяго 8 тон.

Кіраўнік станцыі Баўжыс паведаміў камісіі, што кампаніі было даручана знайсці краіну, якой можна было б прадаць нявыкарыстанае ядзернае паліва, але для гэтага спатрэбіцца згода Расіі, у якой яно было закуплена. Паводле яго слоў, калі б удалося паліва прадаць, то яго не трэба было б размяшчаць у глыбокім сховішчы.

Ну думку кіраўніка Дзяржаўнай інспекцыі па бяспецы атамнай энергетыкі Міхаіла Дземчанкі, перапрацоўваць нявыкарыстанае ядзернае паліва немэтазгодна, паколькі яго ўзбагачэнне занадта нізкае.

• 1
• 0
• 2
• 0
• 1
• 1
• 0
• 0