«З нас смяяліся ва ўсім свеце. Яны больш не смяюцца». Трамп выступіў са зваротам да нацыі. Пра што гаварыў?
Чакалася, што прэзідэнт ЗША абвясціць вайну Венесуэле, але ўвесь выступ ён прысвяціў сваім дасягненням — «за апошнія 11 месяцаў мы прынеслі Вашынгтону больш пазітыўных змен, чым любая адміністрацыя ў амерыканскай гісторыі».
Дональд Трамп рэзка атакаваў свайго папярэдніка, настойваючы на тым, што яго кіраванне краінай утрымлівае толькі перамогі.
«Адзінаццаць месяцаў таму я атрымаў у спадчыну беспарадак, і я яго выпраўляю. Калі я заступіў на пасаду, інфляцыя была найгоршай за 48 гадоў, а некаторыя сказалі б, што і ва ўсёй гісторыі нашай краіны, што прывяло да таго, што цэны сталі вышэйшымі, чым калі-небудзь раней, зрабіўшы жыццё недаступным для мільёнаў і мільёнаў амерыканцаў. Гэта адбылося падчас адміністрацыі дэмакратаў», — сказаў ён.
Паводле яго слоў, мяжа была адкрыта. І з-за гэтага ў краіну «ўварвалася армія з 25 мільёнаў чалавек, многія з якіх прыйшлі з турмаў і калоній, вар'ятняў. Гэта былі гандляры наркотыкамі, члены банд і нават 11 888 забойцаў, больш за 50 працэнтаў з якіх забілі больш за аднаго чалавека. Гэта тое, што адміністрацыя Байдэна дазволіла зрабіць з краінай».
У жаночым спорце гулялі мужчыны, злачыннасць была на рэкордным узроўні, сказаў ён.
«З нас смяяліся ва ўсім свеце. Але яны больш не смяюцца. За апошнія 11 месяцаў мы прынеслі Вашынгтону больш пазітыўных змен, чым любая адміністрацыя ў амерыканскай гісторыі».
Паводле яго слоў, апошнія чатыры гады Злучанымі Штатамі кіравалі палітыкі, якія змагаліся толькі за нелегальных мігрантаў, прафесійных злачынцаў, карпаратыўных лабістаў, тэрарыстаў і, перш за ўсё, замежныя дзяржавы, якія карысталіся ЗША.
«Яны затапілі вашы гарады і мястэчкі нелегальнымі мігрантамі. Яны знішчылі вашы цяжка заробленыя захаванні. Яны навучалі вашых дзяцей нянавісці да Амерыкі, выпусцілі такую колькасць гвалтоўных злачынцаў, якую мы ніколі не бачылі, каб яны палявалі на невінаватых. Яны выклікалі вайну. Яны выклікалі хаос. Яны выклікалі жудасную сітуацыю ва ўсім свеце», — нагнятаў Трамп.
Але цяпер, запэўніваў ён, у ЗША ёсць прэзідэнт, які змагаецца за законапаслухмяных, працавітых людзей краіны. «Тых, хто прымушае гэтую нацыю рухацца, хто прымушае гэтую нацыю працаваць. І ўсяго праз адзін год мы дасягнулі большага, чым хто-небудзь мог сабе ўявіць».
Найперш, Трамп расказаў пра спыненне міграцыйнага патоку.
«За апошнія сем месяцаў ніводнаму нелегальнаму мігранту не было дазволена ўехаць у нашу краіну — подзвіг, які ўсе называлі абсалютна немагчымым. Вы памятаеце, як Джо Байдэн казаў, што яму патрэбны Кангрэс для прыняцця закона, які дапаможа закрыць мяжу? Ён заўсёды вінаваціў Кангрэс і ўсіх астатніх. Як высветлілася, нам не спатрэбілася заканадаўства. Нам проста спатрэбіўся новы прэзідэнт».
Трамп адзначыў, што ўзровень злачыннасці ў краіне ўпаў.
«Проста паглядзіце на Вашынгтон, акруга Калумбія. Там узровень бяспекі, якога мы ніколі раней не бачылі. І яны знішчылі крыважэрныя замежныя наркакартэлі. Мы зрабілі гэта самі, з нашымі людзьмі, і мы так ганарымся гэтым, бо яны атручвалі і знішчалі наша насельніцтва».
Злучаныя Штаты цяпер маюць «самыя магутныя ўзброеныя сілы ў свеце, і блізка нікога няма».
«Я аднавіў амерыканскую моц, урэгуляваў восем войнаў за 10 месяцаў, знішчыў іранскую ядзерную пагрозу і скончыў вайну ў Газе, прынёсшы ўпершыню за 3000 гадоў мір на Блізкі Усход і забяспечыўшы вызваленне заложнікаў, як жывых, так і памерлых».
У самой краіне, паводле яго слоў, ЗША вяртаюць эканоміку «з краю бездані».
«Мінулая адміністрацыя і іх саюзнікі ў Кангрэсе разрабавалі нашу казну на трыльёны долараў, падняўшы цэны на ўсё да ўзроўняў, якіх раней ніколі не бачылі. Я зніжаю гэтыя высокія цэны і зніжаю іх вельмі хутка».
Цэны падаюць, а заробкі растуць, кажа Трамп. «І ўпершыню за шмат гадоў заробкі растуць значна хутчэй за інфляцыю».
Вяртаецца бізнэс у краіну, ствараюцца новыя працоўныя месцы, і яны пераходзяць амерыканцам, а не мігрантам.
«Вялікая частка гэтага поспеху была дасягнутая дзякуючы тарыфам — маё любімае слова, тарыфы, якія на працягу многіх дзесяцігоддзяў паспяхова выкарыстоўваліся іншымі краінамі супраць нас, але не цяпер».
«Год таму наша краіна была мёртвая. Мы былі абсалютна мёртвыя. Наша краіна была гатовая да краху. Поўнага краху. Цяпер мы самая папулярная краіна ў свеце. І гэта кажа кожны лідар, з якім я размаўляў за апошнія пяць месяцаў».
Трамп таксама паабяцаў найбуйнейшае зніжэнне падаткаў у амерыканскай гісторыі, эфектыўную медыцынскую сістэму.
«Мы ставім Амерыку на першае месца, і мы зноў робім Амерыку вялікай. Вельмі проста: мы робім Амерыку вялікай зноў».
Каментары