Агенцтва абвясціла «кантраляваную эвакуацыю» экіпажы з чатырох чалавек. Што стала прычынай раптоўнага рашэння?
Як паведамляе The New York Times, упершыню за чвэрць стагоддзя працы Міжнароднай касмічнай станцыі экіпаж вымушаны пакінуць арбіту датэрмінова па медыцынскіх паказаннях.
Рашэнне аб вяртанні чатырох удзельнікаў місіі Crew-11 прыняў 8 студзеня кіраўнік НАСА Джарэд Айзекман. Агенцтва захоўвае канфідэнцыяльнасць і не называе ні імя астранаўта, ні канкрэтны дыягназ, аднак падкрэслівае, што стан пацыента ацэньваецца як «абсалютна стабільны».
Галоўны доктар НАСА Джэймс Полк растлумачыў сітуацыю так: пакідаць чалавека на арбіце з нявызначаным дыягназам ва ўмовах абмежаваных медыцынскіх рэсурсаў — занадта вялікая рызыка. Таму кіраўніцтва вырашыла праявіць асцярожнасць і вярнуць экіпаж на Зямлю ў рамках «кантраляванай медыцынскай эвакуацыі». Прадстаўнікі НАСА адзначаюць, што гэта не экстраная сітуацыя, а ўзважаная мера засцярогі.
У бліжэйшыя дні карабель SpaceX Crew Dragon адстыкуецца ад МКС і накіруецца да Зямлі для прываднення ў Ціхім акіяне паблізу Сан-Дыега. Дамоў вернуцца астранаўты НАСА Зена Кардман і Майкл Фінк, астранаўт Японскага агенцтва аэракасмічных даследаванняў (JAXA) Кімія Юі і касманаўт «Раскосмаса» Алег Платонаў. Іх місія пачалася ў жніўні і павінна была завяршыцца толькі ў наступным месяцы, пасля прыбыцця змены.
Паведамляецца, што Фінк і Кардман у чацвер, 8 студзеня, павінны былі здзейсніць шасцігадзінны выхад у адкрыты космас для мадэрнізацыі сістэмы электразабеспячэння станцыі. Аднак ён быў адкладзены. Па словах доктара Полка, медыцынская праблема не мае ніякага дачынення да выхаду ў адкрыты космас або працы самой станцыі.
Паводле звестак НАСА, для Майкла Фінка гэта ўжо чацвёрты палёт на касмічную станцыю, а для Кіміі Юі — другі. Кардман і Платонаў адправіліся ў космас упершыню
У рамках місіі некаторыя члены экіпажа ўдзельнічаюць у даследаваннях, прысвечаных ацэнцы ўплыву падарожжаў у далёкі космас на здароўе чалавека. Гэтая праца ўключае вывучэнне таго, як арганізм засвойвае вітаміны групы В у космасе і як адбываецца пераразмеркаванне вадкасцей у арганізме ва ўмовах пастаяннай бязважкасці.
Пасля адлёту Crew-11 на станцыі застануцца трое касманаўтаў, якія прыбылі туды на караблі «Саюз» у лістападзе. Ім давядзецца скараціць аб'ём навуковых даследаванняў, каб забяспечваць працу станцыі меншым складам.
Зараз НАСА і SpaceX разглядаюць магчымасць пераносу запуску наступнай місіі, Crew-12, на больш ранні тэрмін. Пры гэтым кіраўніцтва запэўнівае, што сітуацыя, якая склалася, ніяк не паўплывае на графік місіі Artemis II — палёту вакол Месяца, запланаванага на наступны месяц.
Цяпер чытаюць
Усіх студэнтак беларускіх ВНУ абавязалі тэрмінова запоўніць анкету з пазначэннем свайго росту31
Каментары