У старым доме для партыйнай эліты ў цэнтры Мінска прадалі кватэру за $380 000
9 студзеня, калі краіна знаёмілася з цыклонам Улі, у Мінску адбылася адметная здзелка. Новых гаспадароў займела кватэра, размешчаная ў адным з першых «клубных» дамоў Беларусі.
Пяціпавярховік у Бранявым завулку, 4, быў пабудаваны ў 1967 годзе для партыйнай эліты. Слова «пяціпавярховік» не павінна вас бянтэжыць: ад звыклых усім хрушчовак ён бясконца далёкі, піша Onliner.by.
У цагляным доме на чатыры пад’езды хаваецца ўсяго 44 кватэры з вялікімі вокнамі і трохметровымі столямі. Таксама ў кожнай секцыі ёсць ліфт: ніякіх забегаў на апошні паверх з цяжкімі торбамі. Дом «мэтавы»: кватэры ў ім мелі шэсць былых старшынь Савета міністраў БССР — Мікалай Аўхімовіч, Ціхан Кісялёў, Аляксандр Аксёнаў, Уладзімір Бровікаў, Міхаіл Кавалёў, Вячаслаў Кебіч.
Вядома, за доўгія гады існавання дома жыхары ў ім неаднаразова змяняліся. Наперадзе — яшчэ адно наваселле. Абнаўлення чакае 100‑метровая трохпакаёвая кватэра, размешчаная на адным з ніжніх паверхаў.
Паводле звестак Нацыянальнага кадастравага агенцтва, кватэра была прададзена за салідныя 1 122 900 рублёў, або $380 000 паводле курсу. Гэта значыць, кожны квадратны метр абышоўся пакупніку ў эквіваленце $3800. Што і нядзіўна: кватэра прадавалася са свежым сучасным рамонтам.
Вось як апісвала яе агенцтва, якое займалася продажам аб’екта: «У кватэры выкананы якасны, класічны рамонт з еўрапейскіх калекцыйных матэрыялаў, уся тэхніка прывезена з Еўропы». Новым гаспадарам дастаткова «разгрузіць» канапы-ложкі і расставіць па месцах свае рэчы. На гэты момант гэта самая «цяжкая» ўгода ў Мінску.
Цяпер чытаюць
«Яна была спартыўнай дзяўчынай». Што вядома пра загінулую пасажырку дэльтаплана, які ўпаў пад Мінскам1
Каментары