Здабыча нафты ў Расіі ўпала да мінімуму за апошнія 16 гадоў

Паводле прыведзеных высокапастаўленым чыноўнікам звестак, здабыча нафты ў Расіі зніжаецца ўжо трэці год запар: у 2022 годзе яна складала 535 мільёнаў тон, у 2023‑м — 530 мільёнаў, у 2024‑м — 516 мільёнаў. Ніжэйшыя аб’ёмы фіксаваліся толькі ў 2009 годзе, калі ў краіне здабывалі 494,2 мільёна тон. Нават у пандэмійным 2020 годзе паказчык быў крыху вышэйшы — 512,7 мільёна тон.

На 2025 год расійскім урадам планавалася павелічэнне здабычы да 520 мільёнаў тон. Больш за тое, у межах здзелкі АПЕК+ Расіі дазвалялася нарасціць здабычу — сутачная квота вырасла да 9,57 мільёна бараляў. Аднак, фактычна напрыканцы года здабывалася толькі каля 9,33 мільёна бараляў на дзень, а ў снежні аб’ёмы нечакана рэзка скараціліся яшчэ на 250 тысяч бараляў штодня.

Эксперты звязваюць гэта з санкцыямі ЗША супраць буйных расійскіх нафтавых кампаній, якія ўдарылі па экспарце ў Індыю і Кітай. З канца лістапада, калі санкцыі ўступілі ў сілу, каля 35 мільёнаў бараляў нафты засталіся непрададзенымі і фактычна «завіслі» ў танкерах у моры. Паводле ацэнак, магутнасці для далейшага захоўвання такой нафты ўжо вычарпаныя.

Дадатковай праблемай стаў рэзкі абвал цэн на расійскую нафту Urals — цяпер яна прадаецца па 35—37 даляраў за бараль, што амаль на палову танней за Brent. Праз гэта здабыча на шэрагу радовішчаў стала стратнай. Паводле ацэнак, прыкладна на палове нафтавых праектаў кампаніі страчваюць каля 5 даляраў з кожнага прададзенага бараля. Гэта паглыбляе фінансавыя праблемы галіны: прыбыткі найбуйнейшых кампаній ужо істотна скараціліся.

Аналітыкі адзначаюць, што нафтавая галіна, якая забяспечвае каля чвэрці бюджэтных даходаў і амаль палову экспартнай выручкі Расіі, паступова ўваходзіць у крызіс. У 2019 годзе, на піку, краіна здабывала 560 мільёнаў тон нафты за год, але пасля спаду ў часы пандэміі вярнуцца да тых узроўняў так і не змагла. За сем гадоў здабыча скарацілася прыкладна на 9%, з якіх амаль 5% — ужо пасля пачатку вайны.

Паводле доўгатэрміновай энергетычнай стратэгіі Расіі, у інерцыйным сцэнарыі здабыча нафты можа знізіцца да 477 мільёнаў тон у 2036 годзе і да 287 мільёнаў тон у 2050-м. Праз вычарпанне старых радовішчаў экспарт можа скараціцца ўтрая — з 234 да 79 мільёнаў тон на год.

У яшчэ больш негатыўным, «стрэсавым» сцэнары, які прадугледжвае ўзмацненне санкцый і паскораную глабальную адмову ад вуглевадародаў, да 2050 года Расія будзе здабываць толькі каля 171 мільёнаў тон нафты штогод, а экспарт нафты можа знікнуць цалкам.

• 8
• 0
• 3
• 0
• 0
• 0
• 0
• 0