Ізраільская авіякампанія Arkia пакуль не запусціла прамыя рэйсы з Мінска ў Тэль-Авіў
Ізраільская авіякампанія Arkia ў лютым гэтага года планавала запусціць прамыя рэйсы з Мінска ў Тэль-Авіў. Аднак першы палёт дагэтуль так і не адбыўся, а на сайце перавозчыка немагчыма знайсці квіткі, звярнуў увагу Office Life.
Прамое авіязлучэнне паміж Ізраілем і Беларуссю было прыпынена з 2022 года. У пачатку снежня 2025 года было анансавана, што рэйсы авіякампаніі Arkia з Мінска ў Тэль-Авіў з’явяцца з лютага 2026 года. Як заяўляла камерцыйная дырэктарка Arkia Сапір Іфарган, гэта адпавядае планам кампаніі па пашырэнні сеткі палётаў, а таксама адлюстроўвае рост цікавасці пасажыраў да прамых пералётаў ва Усходнюю Еўропу.
Палёты планавалася выконваць двойчы на тыдзень — па панядзелках і пятніцах. Яны таксама пазначаныя ў сезонным раскладзе Мінскага аэрапорта: з 6 лютага па 27 сакавіка.
Аднак пакуль на табло рэйсаў іх няма, а набыць квіткі з Тэль-Авіва ў Мінск і назад на сайце перавозчыка немагчыма.
Як пацвердзілі Office Life ў Нацыянальным аэрапорце Мінск, у лютым у раскладзе рэйсаў Arkia няма. Ці з’явяцца яны ў сакавіку, пакуль таксама невядома.
Раней айчынная авіякампанія Belavia пасля амаль чатырохгадовага перапынку аднавіла з 8 студзеня рэгулярныя рэйсы з Мінска ў Тэль-Авіў — па чацвяргах і нядзелях.
Каментары