У адным з мінскіх супермаркетаў заўважылі незвычайны прадукт — аліўкавы алей, кошт якога ў пераліку на літр дасягае амаль 1000 рублёў, піша Tochka.by.
Невялікая бутэлечка аб’ёмам 40 мл прадаецца за 37,99 рубля. Калі пералічыць цану на літр, то атрымліваецца больш за 949 рублёў, што і выклікала здзіўленне пакупнікоў.
Паводле інфармацыі на ўпакоўцы, у склад прадукта ўваходзіць 88% аліўкавага алею халоднага адціскання, а таксама часнок і перац чылі. Прадукт настоены на гэтых спецыях, пры гэтым пазначана, што ў ім могуць быць сляды арахісу. Ніякіх асабліва дарагіх або рэдкіх інгрэдыентаў у складзе няма.
Выраблены алей у Італіі, а пастаўляецца ён як у Беларусь, так і ў Расію.
Мяркуецца, што высокая цана звязаная перадусім з арыгінальнай тарай: бутэлечка зробленая ў форме жаночага туфліка на абцасе, што робіць прадукт хутчэй сувенірным, чым звычайным харчовым таварам.
Цяпер чытаюць
Эйсмант: Статкевіча памілавалі ўжо паўгода назад, але тады ён вярнуўся ў турму14
Каментары