Напярэдадні свайго пераабрання на пасаду лідара партыі ХДС Фрыдрых Мерц даў вялікае інтэрв'ю нямецкім выданням Neue Berliner Redaktionsgesellschaft (NBR) і Rheinpfalz. У размове палітык акрэсліў сваё бачанне будучыні адносін з Масквой, перспектывы аднаўлення эканамічных сувязяў і прыроду цяперашняга расійскага рэжыму.
Адказваючы на пытанне журналістаў пра галасы тых, хто спадзяецца на аднаўленне паставак расійскага газу, Мерц быў катэгарычны.
«Гэта не варыянт, пакуль Пуцін вядзе гэтую злачынную вайну», — падкрэсліў ён, а газавае партнёрства з Расіяй назваў «фатальнай залежнасцю».
«Нам не варта мець ілюзій: расійская ўладная групоўка ў найбліжэйшай перспектыве наогул не можа абысціся без вайны. Ёй трэба падтрымліваць працу ваеннай машыны, таму што ў яе няма плана, што інакш рабіць з сотнямі тысяч салдат, якія вяртаюцца з фронту, часткова з цяжкімі псіхалагічнымі траўмамі. На маю думку, гэтая вайна скончыцца толькі тады, калі адзін з бакоў будзе вычарпаны — або ў вайсковым, або ў эканамічным плане», — выказаў сваё меркаванне Мерц.
Як даводзіць канцлер, мэта краін Еўропы палягае у тым, «каб расійская дзяржава больш не магла весці вайну ў вайсковым плане і не магла далей фінансаваць яе эканамічна».
«Ні розум, ні гуманітарныя аргументы не пераканаюць Пуціна. Гэта горкая праўда», — падкрэсліў ён.
«Найглыбейшае варварства»
Асобная ўвага ў інтэрв'ю была нададзена асобе Уладзіміра Пуціна. Журналісты спыталі, ці магчымыя нармальныя адносіны з чалавекам, які, напрыклад, аддаў загад атруціць апазіцыянера Аляксея Навальнага ў калоніі.
«Я лічу гэта амаль немагчымым. Калі я гляджу на гэты рэжым і гэты сляпы тэрор, у мяне мала надзеі», — адказаў Мерц.
Каб апісаць стан сучаснай Расіі, палітык звярнуўся да гісторыі:
«Ёсць цікавая цытата французскага пісьменніка Астольфа дэ Кюсціна з XIX стагоддзя, які пасля доўгіх падарожжаў па Расіі сказаў: «Расія ў нашы дні — самая дзіўная краіна для назіральніка, таму што ў ёй можна знайсці найглыбейшае варварства побач з найвышэйшай цывілізацыяй».
На думку Мерца, гэтыя словы застаюцца актуальнымі і праз два стагоддзі.
«Гэтай цытаце 200 гадоў, і, на жаль, яна справядлівая і сёння. Зараз мы бачым гэтую краіну ў стане найглыбейшага варварства. У блізкім часе гэта не зменіцца, і з гэтым нам давядзецца змірыцца», — рэзюмаваў Фрыдрых Мерц.
Каментары
Варварство в средневековых "скрепах", в пропаганде морали 19 века, а то и "домостроя"