Ці шкодзіць рухавіку біядызельнае паліва?
Ці шкодзіць рухавіку біядызельнае паліва?
2010 год — апошні для выканання Дзяржаўнай праграмы па забеспячэнні вытворчасці дызельнага біяпаліва ў Беларусі на 2007—2010 гады. Згодна з праектам, увесь аб’ём дызпаліва ў краіне мусіць прадавацца з 5‑працэнтавым дадаткам рапсу. Эфект — ашчаджэнне 300 тысяч тон нафты штогод.
На цяпер у Мінску ўсяго 10 з 79 заправак маюць асобную калонку з біядызельным палівам. Адкрываць новыя пакуль не дазваляе попыт: уладальнікі новых дарагіх іншамарак не рызыкуюць заліваць падазронае «БП» у свае бакі.
Беларускае біяпаліва — гэта 95% традыцыйнай саляркі і 5% метылавых эфіраў тлушчавых кіслот рапсавага алею. Такая сумесь цалкам адпавядае нарматыўным патрабаванням да паліва, якія выстаўляюцца ў краінах ЕС. Сярод плюсаў такога алейнага дадатку называюць змяншэнне колькасці шкодных выкідаў у атмасферу, лепшую шмаровачную здольнасць рапсавага паліва.
У ЕС наогул няма чыстай саляркі, там усё дызельнае паліва ідзе з такім 5‑працэнтавым дадаткам. А вось біяпалівам на Захадзе называюць 100‑працэнтавы заменнік — вельмі добра ачышчаны рапсавы алей халоднага выціску. Таму, набываючы дызельнае аўто, не варта баяцца маркіроўкі «не эксплуатаваць на біядызелі» (no biodiesel) — гаворка ідзе менавіта пра 100‑працэнтнае біяпаліва.
Прадстаўнікі афіцыйных імпарцёраў заходніх аўто кажуць, што на паперы ўсё сыходзіцца, і беларускае паліва заліваць у машыны можна. Такога меркавання прытрымліваюцца прадстаўнікі «Сітраена», «Рэно», «Пежо», «Фольксвагена», «Мазды»… Але ў прыватных размовах яны кажуць, што свае аўто біяпалівам не запраўлялі б. Маўляў, цяжка адсачыць, ці дакладна вытрымліваецца тэхналагічны працэс яго вырабу і захоўвання. Напрыклад, захоўваць біядызель можна не болей за тры месяцы — пасля арганічныя рэчывы, якія ў ім утрымліваюцца, пачынаюць раскладацца, змяняючы хімічны склад паліва. А гэта, у сваю чаргу, нашкодзіць машыне.
Таксама ў шэрагу праблемаў, якія згадваюць аўтамабілісты, што залівалі навінку, — зніжэнне магутнасці матора, большы расход паліва і паскораны знос фільтраў. Рамонт дарагой машыны каштуе больш за ўяўнае ашчаджэнне на кожным літры дызеля.
Галоўная ж перавага біяпаліва — яно таннае. Праз прэзідэнцкі ўказ акцызы на яго зменшаныя. У якасці бонуса — з выхлапной трубы пачынае пахнуць блінамі. У вёсках за трактарамі бяжыць чарада катоў і сабак, якіх прываблівае водар.
Цэны на АЗС Беларусі
Дызельнае паліва — 2 580 рублёў
Біядызельнае паліва — 2 220 рублёў
Каментары