Людзі жахнуліся заробку нянечкі ў садку побач з Нацыянальнай бібліятэкай
«Валасы дыбам ад заробкаў… Няўжо нехта знойдзецца».
«Веру ў сілу Threads. Мінск. Патрэбна дапамога ў пошуку супрацоўнікаў», — з такой надзеяй пачала свой пост супрацоўніца адной са сталічных дашкольных устаноў. Дзяўчына апублікавала спіс вакансій у дзіцячым садку №571 Мінска, што месціцца па адрасе Францыска Скарыны, 7, недалёка ад станцыі метро «Усход».
Вакансіі наступныя:
- дзённы вартаўнік (0,65 стаўкі, працоўны дзень — 5 гадзін 30 хвілін): заробак каля 500—600 рублёў.
- прыбіральнік службовых памяшканняў: на 1 стаўку — каля 800 рублёў, на 1,5 стаўкі — каля 1200 рублёў.
- памочнік выхавацеля (нянечка): заробак каля 1000 рублёў.
Аднак замест водгукаў ад кандыдатаў у каментарах людзі абурыліся заробкамі.
«Валасы дыбам ад заробкаў… Няўжо нехта знойдзецца…» — жахнулася адна з жанчын.
Іншая падхапіла: «Вы б лепш верылі не ў сілу Threads, а ў сілу заробкаў. Прыбіральнік на паўтары стаўкі — гэта 1200 у месяц за 12 гадзін працы на дзень?»
Градус дыскусіі ў каментарах пачаў імкліва расці:
«Пачакайце хвілінку, работнікаў? Ці бясплатных рабоў?» — удакладняе нехта.
«За такія грошы трэба прыходзіць на працу і яшчэ шкодзіць», — катэгарычна заяўляе чарговы каментатар.
«За такі заробак? Тут і трэдс бяссільны!», «Кашмар», «Не хачу сказаць нічога дрэннага, але ў мяне пенсія большая. І я не міліцыянер і не вайсковец», «Адэкватная зарплата тут толькі ў вартаўніка, бо гэта не поўная стаўка і некваліфікаваная праца», «Жахлівыя зарплаты, проста дно», — пішуць беларусы.
Асобнае абурэнне выклікала розніца ў нагрузцы і аплаце працы нянечак.
«Які кашмар!!! Нянечка — 1000 рублёў. Гэта чалавек, які глядзіць за дзецьмі цэлы дзень і яшчэ дупы ім выцірае. Куды мы коцімся…», «Сумна, што ў няні нагрузка ў сто разоў большая, чым у прыбіральніка, ды і адказнасць, а зп амаль аднолькавая».
Для многіх гэты пост стаў нагодай узгадаць уласны горкі досвед працы ў дзяржаўных установах.
Людзей таксама здзівіла, як пазначаныя заробкі стасуюцца з заканадаўствам:
«А чаму прыбіральніцы плацяць менш за мінімалку? Даўно праверак не было?»; «А ці законна гэта — зп 800 руб?»
Адзін з каментатараў параіў: «Людзі, што ў вас з заробкамі? За 500—600 рублёў працаваць месяц? Паспрабуйце самі. Раскіньце паміж сваімі работнікамі, хай папрацуюць».
На рэзкае пытанне «Вы ўгараеце?» аўтарка паста адказала:
«Здаецца, угараеце тут толькі вы. І так, гэта мала, але такія заробкі існуюць, і пры гэтым людзі за гэтыя грошы добра працуюць! Ёсць тыя, у каго няма магчымасці пайсці ў іншае месца, ці тыя, хто на пенсіі, але хоча падзарабіць».
Дзяўчына патлумачыла, што сама ездзіць на працу на «Усход» ажно з «Каменнай Горкі» і вельмі задаволеная ўстановай, куды трапіла па размеркаванні. Паводле яе слоў, у садку добрае забяспячэнне: «Абсталяванне закупляюць, прынтары каляровыя з ноўтбукамі закупілі ў кожную групу, з заробкам не крыўдзяць нават на яслях».
Сама яна працуе выхавальнікам суправаджэння для дзяцей з расстройствамі аўтыстычнага спектру і атрымлівае 1500 рублёў.
Кропку ў спрэчцы паставіла карыстальніца, якая лічыць гэтую сітуацыю хранічнай хваробай сістэмы:
«Усе так уз'еліся праз гэтыя заробкі, што аж смешна)) Гэта класіка як для сталіцы, так і для правінцыі, бо ў сістэме адукацыі так было заўсёды)) Гэта рэальнасць, так, уяўляеце?)) Усім шчыра пофіг, што гэта катаржная праца. Як плацілі капейкі, так і будуць гэта рабіць!»
У Мінску шукаюць супрацоўніка на заробак 19 000 рублёў
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку
Блогерка засталася ў захапленні ад крамы з таварамі, вырабленымі зняволенымі — яе радасць не зразумелі
Цяпер чытаюць
У чым прычына незадаволенасці жыхароў мікрараёна Лебядзіны ў Мінску? Вось што насамрэч там планавалі будаваць4
Каментары