Беларускія таксісты звярнуліся ў Міністэрства антыманапольнага рэгулявання і гандлю з просьбай падняць тарыфы. Асацыяцыя перавозчыкаў пасажыраў аўтамабілямі-таксі падзялілася адказам.
У ведамстве паведамілі, што тарыфы на паслугі таксі не падлягаюць дзяржаўнаму цэнаваму рэгуляванню. Суб’екты вызначаюць іх самастойна, улічваючы шматлікія фактары: выдаткі, кан’юнктуру рынку, маркетынгавую палітыку і іншыя.
— Цяпер у сферы транспарту падлягаюць цэнаваму рэгуляванню тыя паслугі, якія забяспечваюць сацыяльныя стандарты і гарантыі насельніцтву пры рэгулярных перавозках пасажыраў, — адзначылі ў МАРГ.
Там параілі пры прыняцці рашэнняў аб павышэнні цэн прытрымлівацца агульнанацыянальных падыходаў справядлівага цэнаўтварэння і прагназаванага на 2026 год узроўню інфляцыі (7%).
— У сувязі з гэтым рост тарыфаў на паслугі па перавозцы пасажыраў аўтамабілямі-таксі ў прапанаваным Асацыяцыяй памеры (на 30%) зараз не падтрымліваецца МАРГ, — гаворыцца ў паведамленні.
Па інфармацыі ведамства, магчымы паўторны зварот аб павышэнні тарыфаў таксі па выніках I паўгоддзя 2026 года з улікам паказчыка індэкса спажывецкіх цэн.
Каментары