У Смалявічах адкрылі аддзяленне банка, якое працуе адзін дзень на тыдзень
У чым падвох?
Маладая мама з Смалявіч падзялілася ў Трэдс здымкам з рэжымам працы аддзялення МТБанка.
«Адкрылі МТБанк. Як вам графік працы?» — напісала дзяўчына і дадала два фоты з раскладам.
Працуе аддзяленне толькі па чацвяргах з 10 да 18 гадзін з перапынкам на абед з 13:00 да 13:30.
Каментатары адразу пачалі кпіць з такога раскладу і называць гэта месца працай мары. «Графік, на які я спадзяюся пры пошуку вакансій», «Абед усяго паўгадзіны — рабскія ўмовы працы», «Гучыць як праца мары», — жартуюць карыстальнікі.
На допіс хутка адказалі з банкаўскага акаўнта ў Трэдс і патлумачылі сітуацыю.
«Мы адкрываем АПМ (аддаленыя працоўныя месцы) у невялікіх населеных пунктах з клопатам пра нашых кліентаў. У такім кампактным міні-офісе можна хутка аформіць крэдыт, карту, зрабіць уклад і іншае без страты часу і сродкаў на паездку ў абласны цэнтр», — тлумачыць МТБанк.
З працай мары не ўсё так адназначна
Адзін з каментатараў адзначыў, што на самой справе гэта далёка не праца мары.
«Той чалавек, які прыязджае сюды на гэты дзень, верагодна, працуе як «мабільны спецыяліст», таму праца далёка не мары, калі ты за тыдзень аб’язджаеш маленькія мястэчкі ў акрузе», — напісаў мужчына.
Такім чынам банк эканоміць грошы на адкрыцці паўнавартаснага аддзялення, якое будзе працаваць 5/2, што можа быць нявыгадна праз малы паток кліентаў. А жыхары невялікіх населеных пунктаў атрымліваюць магчымасць праз падобныя кропкі раз на тыдзень вырашаць пытанні, якія немагчыма вырашыць анлайн, не выязджаючы ў найбліжэйшы буйны горад.
Хутчэй за ўсё, задумваецца, што спецыяліст працуе па такім графіку: у панядзелак — у адным гарадку, у аўторак — у іншым, у сераду — у трэцім.
Праўда, пакуль што смалявіцкаму банкаўскаму работніку няма куды ехаць на працу ў іншыя дні. Іншых падобных пунктаў МТБанк пакуль не адкрываў.
На сайце МТБанка пазначана, што ў банка агулам ёсць 17 «аддаленых працоўных месцаў» па ўсёй краіне, але ўсе яны адкрытыя па звыклым графіку — пяць-шэсць дзён на тыдзень.
Цяпер чытаюць
«Ёсць у Беларусі людзі, якім не падабаецца расійскі сцяг, савецкі сцяг». Расіяніну на BMW Х7 з нямецкімі нумарамі пашкодзілі аўто ў Мінску5
Каментары