«Джэй Дзі, каханенькі!» Тролінг Эль-Саеда на адрас Вэнса завірусіўся ў сацсетках

На выбарах 3 лістапада 42‑гадовы Абдул Эль-Саед перамог у штаце Мічыган рэспубліканца Майка Роджэрса. Ён стане першым мусульманінам у гісторыі Сената ЗША. Ягоная перамога з саліднай, 6‑працэнтнай перавагай, стала асабліва заўважнай на фоне кампаніі, падчас якой вядучыя рэспубліканцы атакавалі яго не толькі за палітычныя погляды, але і за мусульманскае веравызнанне.

У кастрычніку, выступаючы на мітынгу ў падтрымку рэспубліканца Майка Роджэрса, Джэй Дзі Вэнс абвінаваціў Абдулу Эль-Саеда ў нелюбові да Амерыкі і непавазе да яе гісторыі. Ён заявіў, што дэмакрат, які нарадзіўся і вырас у Мічыгане, павінен быць удзячны краіне за магчымасці, якія атрымаў.

Віцэ-прэзідэнт назваў Эль-Саеда «ласачкай» (little weasel), якой варта заткнуць рот і быць удзячным Амерыцы.

У англійскай мове weasel — не толькі назва звярка, але і зняважлівае абазначэнне хітруна, праныры, як у нас ліса. Эль-Саед адказаў, што ён не ласка, а расамаха (wolverine), намякнуўшы на назву спартыўных камандаў Мічыганскага ўніверсітэта, які ён скончыў, — Michigan Wolverines («Мічыганскія расамахі»).

Пасля перамогі Эль-Саед не прапусціў нагоды пакпіць з Вэнса. Выступаючы перад прыхільнікамі ў Дэтройце, ён звярнуўся непасрэдна да віцэ-прэзідэнта:

«Джэй Дзі, хабібі, вельмі смешна, што, паводле Канстытуцыі ты будзеш абавязаны прывесці мяне да прысягі ў студзені».

“JD, habibi, there is this delicious irony in the fact that you're constitutionally obligated to swear me in in January,” said Democrat Abdul El-Sayed after his projected win in the Michigan Senate race, in a dig at Vice President JD Vance. https://t.co/6Y4bsrByfj

— CBS News (@CBSNews) November 4, 2026

Хабібі па-арабску азначае «даражэнькі», «каханенькі». У гэтым выпадку ласкавы зварот прагучаў як паблажлівая іронія з чалавека, які незадоўга да выбараў публічна абражаў Эль-Саеда. У падтэксце тут яшчэ і падкрэслена маскулінны стыль, якога стараецца трымацца Вэнс.

Людзі ў зале выбухнулі смехам.

«Расамахі» — 1, «Бакайз» — 0», — працягнуў Эль-Саед, намякаючы на даўняе суперніцтва Мічыганскага ўніверсітэта з Універсітэтам штата Агаё, які скончыў Вэнс. Спартыўныя каманды апошняга называюцца «Бакайз» (Buckeyes

Buckeye літаральна азначае «вока аленя» (buck — самец аленя, eye — вока). Так называюць паўночнаамерыканскае дрэва, роднаснае конскаму каштану. Ягоныя бліскучыя карычневыя насеніны са светлай плямай нагадваюць аленевае вока. Дрэва стала сімвалам штата Агаё, а слова Buckeyes — мянушкай яго жыхароў і назвай універсітэцкіх каманд

).

Дасталося і Дональду Трампу. Падчас кампаніі прэзідэнт неаднаразова перакручваў імя Эль-Саеда, называючы яго «Махамедам», і выкарыстоўваў у дачыненні да яго слова «джыхадыст».

«Дональд, я ведаю, што табе цяжка даецца маё імя. Таму пасля таго, як Джэй Дзі прывядзе мяне да прысягі ў студзені, можаш называць мяне проста сенатарам», — са смехам заявіў пераможца.

Відэа з пераможнай прамовай завірусілася па сацсетках. Многія назвалі зварот да Вэнса «тролінгам найвышэйшага ўзроўню».

Хто такі Абдул Эль-Саед

Новаабраны сенатар нарадзіўся ў Мічыгане ў сям'і выхадца з Егіпта, які прыехаў у ЗША вучыцца. Сам палітык вывучаў біялогію і паліталогію ў Мічыганскім універсітэце, пасля чаго атрымаў доктарскую ступень у галіне грамадскага здароўя ў Оксфардзе, дзе вучыўся па прэстыжнай стыпендыі Родса. Пазней ён скончыў медыцынскую школу Калумбійскага ўніверсітэта.

У 30 гадоў Эль-Саед узначаліў дэпартамент аховы здароўя Дэтройта, пазней кіраваў адпаведнай службай акругі Уэйн. 

На выбарах у Сенат Эль-Саед выступаў за бясплатную медыцыну для ўсіх, павышэнне падаткаў для багатых і абмежаванне ўплыву карпарацый на палітыку. Таксама ён рэзка крытыкаваў Ізраіль за руйнаванне Газы.

• 2
• 1
• 1
• 0
• 0
• 0
• 0
• 0