Prazrystyja sandali, šłapaki dy tufli ź miakkaha płastyku, jakija byli papularnyja ŭ 1990-ja, znoŭ viarnulisia ŭ modnyja kalekcyi. Ciapier ich vypuskajuć jak masavyja brendy, tak i viadučyja modnyja damy, prapanoŭvajučy novyja formy i kolery.
Prazrysty abutak z ełastyčnaha płastyku, viadomy pad anhlijskaj nazvaj jelly shoes, staŭ adnym z prykmietnych trendaŭ siezona. Jak piša Rzeczpospolita.pl, kali tryccać hadoŭ tamu jany asacyjavalisia pieradusim ź dziciačym i moładzievym harderobam, to siońnia dyzajniery prapanujuć ich u samych roznych varyjantach — ad spartyŭnych madelaŭ da elehantnych tuflaŭ na abcasach.
Historyja hetaha abutku pačałasia jašče pry kancy 1970-ch, kali brazilski brend Melissa vypuściŭ pieršyja madeli z hnutkaha płastyku. Adnak sapraŭdnuju papularnaść jany nabyli ŭ 1990-ja, kali stali adnym ź simvałaŭ letniaj mody.
Novaja chvala cikavaści da jelly shoes pačałasia ŭ 2024 hodzie paśla taho, jak vialikuju ŭvahu pryciahnuli płastykavyja šlopancy amierykanskaha brenda The Row. U nastupnym hodzie prazrysty abutak źjaviŭsia ŭ kalekcyjach Skims, Giambattista Valli, Chloé i Puma, jakaja vypuściła madel u supracoŭnictvie z brendam Fenty śpiavački Ryjany.
Sioleta padobnyja madeli prapanujuć jak masavyja brendy H&M, Marks & Spencer i COS, tak i luksavyja modnyja damy. Prazrystyja basanožki, tufli i vjetnamki taksama možna ŭbačyć u harderobach znakamitaściaŭ, siarod jakich aktrysy Zoi Kravic, Dženifier Łoŭrens i Bruk Šyłds.
Dyzajniery nie abmiažoŭvajucca kłasičnymi basanožkami. U novych kalekcyjach źjavilisia płatformy, tufli na nievysokich abcasach, madeli z vysokaj chalavaj i bolš spartyŭnyja varyjanty.
Sam brend Melissa, ź jakoha pačałasia historyja hetaha abutku, sioleta pradstaviŭ sumiesnyja kalekcyi z Ganni i Diesel. Jimmy Choo i Loewe zrabili staŭku na madeli ź nievysokimi abcasami, Chloé pakazaŭ prazrystyja tufli z ramieńčykami, a Valentino Garavani — basanožki, jakija nahadvajuć karunki.
Da trendu dałučyŭsia i Nike, abnaviŭšy madel Rejuven8 Run, upieršyniu pradstaŭlenuju ŭ 2008 hodzie. Jana atrymała prazrysty płastykavy karkas i zdymny ŭnutrany «škarpetkapadobny» elemient ź sietki.
Prazrysty płastykavy abutak źjaŭlajecca i ŭ mužčynskich kalekcyjach. Naprykład, na pakazie Saint Laurent siezona viasna—leta 2027 dyzajnier Entani Vakareła pradstaviŭ mužčynskija tufli z napaŭprazrystaha materyjału, jakija stali adnoj z samych abmiarkoŭvajemych detalaŭ kalekcyi.
Razam z papularnaściu takoha abutku znoŭ uźnikli i pytańni pra jaho praktyčnaść. Prazrysty płastyk moža nacirać nohi, a asnoŭny materyjał, poliviniłchłaryd (PVCH), niaredka krytykujuć praź jaho ŭpłyŭ na navakolnaje asiarodździe. Tym nie mienš heta nie pieraškodziła viartańniu trendu ŭ kalekcyi mnohich vytvorcaŭ.
Ciapier čytajuć
I pra realnych bandytaŭ, i pra kryvarukaha Kościu-plitačnika, i pra seks u ciahniku. Žurnalistka z Homiela napisała knihu — čytać jaje strašna i śmiešna1111
Kamientary