Поўдзень Еўропы змагаецца з ляснымі пажарамі, у Іспаніі надзвычайнае становішча
Краіны Паўднёвай Еўропы працягваюць барацьбу з маштабнымі ляснымі пажарамі, якія распаўсюджваюцца на фоне рэкорднай спёкі і працяглай засухі. Найбольш складаная сітуацыя назіраецца ў Іспаніі, Францыі і Італіі, паведамляе Euronews.
У Іспаніі ўлады ўвялі агульнанацыянальны рэжым надзвычайнай сітуацыі ў сувязі з пажарамі, якія пагражаюць населеным пунктам паблізу Мадрыда і ў правінцыі Авіла. Паводле афіцыйных звестак, раніцай 24 ліпеня агонь на захад ад сталіцы ўсё яшчэ заставаўся непадкантрольным, хоць аварыйным службам удалося часткова стрымаць яго распаўсюджанне.
З небяспечных раёнаў былі эвакуяваныя тысячы жыхароў. Пры гэтым сіноптыкі прагназуюць, што ў асобных рэгіёнах краіны тэмпература паветра можа дасягнуць 44 градусаў.
У Францыі ўрад звярнуўся па дапамогу да Еўрапейскага саюза, задзейнічаўшы механізм цывільнай абароны ЕС. Прэзідэнт краіны Эмануэль Макрон заявіў, што сітуацыя застаецца надзвычай напружанай, асабліва ў дэпартаменце Жыронда на паўднёвым захадзе краіны, дзе агонь ужо знішчыў больш за 8,7 тысячы гектараў лесу.
Для дапамогі французскім пажарнікам у краіну будуць накіраваныя два самалёты Canadair з Харватыі, два самалёты Air Tractor з Партугаліі, а таксама два цяжкія верталёты Black Hawk з Чэхіі і Славакіі.
Макрон таксама выказаў спачуванні сем'ям двух пажарнікаў, якія загінулі падчас тушэння агню ў прыгарадзе Бардо.
Яшчэ адзін буйны пажар працягваецца ў дэпартаменце Вар на паўднёвым усходзе Францыі, дзе агонь ужо ахапіў каля 2,7 тысячы гектараў. З ім змагаюцца каля 800 пажарнікаў пры падтрымцы авіяцыі.
У Італіі да ліквідацыі пажараў, галоўным чынам на Сіцыліі, прыцягнутыя каля 6 тысяч супрацоўнікаў аварыйных службаў, у тым ліку пажарнікі, леснікі і ратавальнікі грамадзянскай абароны. Найбольш складаная сітуацыя склалася ў раёнах Казаболі, Бівона, Алімена, Сан-Катальда, Галаці-Мамерціна, у прыродным парку Мадоніе і паблізу Сіракузаў.
У пачатку тыдня падчас тушэння пажару ў Сан-Катальда загінуў ратавальнік Алясандра Маркі. Яго памяць ушанавала прэм'ер-міністарка Італіі Джорджа Мелоні.
Паводле даных Еўрапейскай інфармацыйнай сістэмы па лясных пажарах, з пачатку 2026 года ў краінах Еўрапейскага саюза агонь ужо знішчыў 254 388 гектараў лясоў і іншых прыродных тэрыторый.
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі4
Каментары