Улады Іспаніі заявілі, што сітуацыя з буйнымі ляснымі пажарамі каля Мадрыда выйшла з-пад кантролю, а іх лакалізацыя ўжо перавышае магчымасці пажарных службаў. Раней у краіне быў уведзены рэжым надзвычайнай сітуацыі, а кіраўніца аўтаномнай супольнасці Мадрыд Ісабель Дыяс Аюса назвала гэты пажар самым маштабным за ўсю гісторыю рэгіёна, піша Бі-бі-сі.
Кіраўнік рэгіянальнай службы па надзвычайных сітуацыях Карлас Навільё паведаміў, што агонь знаходзіцца ў самай актыўнай фазе і працягвае распаўсюджвацца ў бок муніцыпалітэтаў Рабледа-дэ-Чавела і Фрэснедзільяс-дэ-ла-Аліва, размешчаных за некалькі дзясяткаў кіламетраў на захад ад Мадрыда.
Улады ўжо распарадзіліся эвакуяваць жыхароў гэтых населеных пунктаў. Па словах Навільё, у некаторых раёнах тушэнне пажару ўжо немагчымае, таму цяпер асноўная ўвага надаецца абароне населеных пунктаў і стрымліванню агню.
Рэгіянальныя ўлады таксама заклікалі жыхароў Мадрыда і ваколіц не выходзіць без неабходнасці на двор. З-за дыму значна пагоршылася якасць паветра. Асабліва асцярожнымі варта быць дзецям, пажылым людзям, цяжарным жанчынам, а таксама людзям з захворваннямі дыхальнай і сардэчна-сасудзістай сістэм.
Жыхарам параілі трымаць зачыненымі вокны, дзверы і вентыляцыйныя адтуліны, каб не дапусціць пранікнення дыму ў памяшканні.
Тым часам у Францыі ўлады распарадзіліся поўнасцю эвакуяваць людзей з мыса Кап-Ферэ на паўднёвым захадзе краіны. Маштабныя лясныя пажары ў рэгіёне Жыронда пагражаюць дзясяткам тысяч мясцовых жыхароў і турыстаў, якія могуць аказацца адрэзанымі агнём.
Паводле апошніх даных Міністэрства ўнутраных спраў Францыі, у Францыі і Іспаніі ўжо эвакуявана каля 135 тысяч чалавек.
Сіноптыкі і ратавальныя службы адзначаюць, што сітуацыя застаецца вельмі складанай. Шматмесячныя спёка і засуха стварылі спрыяльныя ўмовы для распаўсюджвання агню, а дажджоў у найбліжэйшыя дні не чакаецца. Больш за тое, на наступным тыдні прагназуецца новае павышэнне тэмпературы, што можа яшчэ больш ускладніць барацьбу з пажарамі.
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары