Дом Масквы ў Мінску курыруе супрацоўнік ФСБ

Дом Масквы ў Мінску курыруе супрацоўнік расійскай спецслужбы Сяргей Макшанцаў. Да такой высновы журналісты «Бюро» прыйшлі на падставе звестак крыніц, выцекаў і адкрытых даных.

Дом Масквы праводзіць у Беларусі канферэнцыі і іншыя мерапрыемствы для расійскіх «суайчыннікаў».

Гэта пляцоўка для прасоўвання ідэй «рускага свету» і інструмент уплыву Крамля.

Арганізацыя падпарадкоўваецца Маскоўскаму дому суайчынніка — установе, створанай урадам Масквы для працы з рускамоўнай дыяспарай за мяжой. Макшанцаў з 2022 года займае там пасаду намесніка дырэктара.

Што звязвае Макшанцава з ФСБ

Дзве незалежныя адна ад адной крыніцы ў еўрапейскай разведвальнай службе назвалі Макшанцава супрацоўнікам Пятай службы ФСБ, піша «Бюро».

Журналісты таксама выявілі, што ён лётаў за мяжу разам з Максімам Яроміным, які ў базах The Insider пазначаны як кадравы афіцэр гэтай службы.

Яшчэ адна сувязь знайшлася ў выцеку: адрасам пражывання Макшанцава пазначаная маскоўская кватэра, якая лічыцца за ФСБ. 

Паводле справаздачы Службы знешняй разведкі Эстоніі, ФСБ выкарыстоўвае Маскоўскі дом суайчынніка як прыкрыццё для сваіх супрацоўнікаў. У дакуменце названы Максім Сапуноў, які працаваў намеснікам дырэктара гэтай установы ў 2013—2015 гадах. Макшанцаў заняў такую пасаду ў 2022-м.

Канферэнцыі ў Мінску і кантакты з прарасійскімі актывістамі

Як вынікае са звестак пра пералёты, на якія спасылаецца «Бюро», пасля прызначэння Макшанцаў наведваў Бішкек, Ерэван, Баку і Мінск.

У верасні 2024 года ён удзельнічаў у канферэнцыі «Расійская дыяспара. Рэаліі і перспектывы» ў Доме Масквы ў Мінску. У маі 2026‑га выступаў там на канферэнцыі «Масква і суайчыннікі. Праца, задачы, перспектывы».

Тады Макшанцаў абяцаў працягваць падтрымку расійскіх «суайчыннікаў» за мяжой:

«Хачу перш за ўсё адзначыць, што ўрад Масквы будзе працягваць аказваць максімальна магчымую дапамогу суайчыннікам, якія жывуць за мяжой. І ў першую чаргу краінам блізкага замежжа — тым, хто да нас найбольш блізкі геаграфічна, і шмат у якіх іншых аспектах».

У тым жа мерапрыемстве ўдзельнічаў кіраўнік «Руху Саюз» Сяргей Лушч. Раней «Бюро» пісала, што ён атрымлівае расійскія грошы на падтрымку пракрамлёўскіх актывістаў у Беларусі.

Пятая служба ФСБ займаецца знешняй разведкай, палітычным аналізам, пошукам, вярбоўкай і фінансаваннем пракрамлёўскіх актывістаў за мяжой. Як адзначае «Бюро», перад поўнамаштабным уварваннем ва Украіну менавіта гэтая служба падавала Уладзіміру Пуціну звесткі пра палітычную сітуацыю ў краіне і рыхтавала там прарасійскую пятую калону.

• 1
• 0
• 1
• 0
• 0
• 0
• 4
• 0