Трагедыя ў іспанскім чэмпіянаце: гулец памёр у выніку сутыкнення з галкіперам
Трагедыя здарылася ў матчы 12‑га тура Сегунды (другога дывізіёна) паміж «Тэнэрыфэ» і «Андорай» (2:2).
На сёмай кампенсаванай да другога тайма хвіліне галкіпер гасцей Хесус Авона груба збіў форварда супернікаў Хесуса дэ Мігеля ў цэнтры поля, спрабуючы не даць яму завалодаць мячом. За гэта брамнік адразу атрымаў прамую чырвоную картку.
Форвард застаўся ляжаць на газоне, і праз некалькі секунд іншыя футбалісты заўважылі, што ён страціў прытомнасць. Гульца «Тэнэрыфэ» даставілі ў бальніцу на машыне хуткай дапамогі.
У дэ Мігеля амаль на 20 хвілін спыніліся сэрца і дыханне. Па дарозе ў бальніцу яму праводзілі сардэчна-лёгачную рэанімацыю.
Сёння раніцай клуб паведаміў, што 30‑гадовы іспанскі футбаліст памёр.
«З болем у сэрцы і камяком у горле, не ў сілах паверыць, што гэта праўда, «Тэнэрыфэ» паведамляе пра трагічную смерць Хесуса дэ Мігеля, якая наступіла ў гэты аўторак, 3 лістапада 2026 года, а 08:00.
Няма слоў суцяшэння, абсалютна нічога, што магло б змякчыць гэты смутак. Мы побач з яго спустошанай сям'ёй, побач з яго блізкімі, побач з усімі, хто сёння аплаквае гэты страшны вынік.
Сям'я Хесуса дэ Мігеля дзякуе за кожную праяву падтрымкі і з той жа шчырасцю просіць з максімальнай павагай паставіцца да іх прыватнага жыцця ў гэтыя страшныя хвіліны», — гаворыцца ў паведамленні клуба.
Цяпер чытаюць
Арыштавалі прадстаўнікоў кампаніі Bayer у Беларусі4
Каментары