У Польшчы будуць судзіць жанчыну, якая збіла ўкраінскіх дзяцей і ўсхваляла расійскую агрэсію
26‑гадовую Караліну О. абвінавачваюць у нападзе на ўкраінскіх падлеткаў на школьнай пляцоўцы ў Легніцы. Паводле пракуратуры, яна абражала дзяцей праз іх нацыянальнасць, ударыла траіх і публічна ўхваляла вайну Расіі супраць Украіны.
Пракуратура польскай Легніцы накіравала ў суд абвінаваўчы акт у дачыненні да 26‑гадовай Караліны О., якая напала на групу дзяцей з Украіны на школьнай спартыўнай пляцоўцы.
Жанчыну абвінавачваюць у публічнай абразе шасці непаўналетніх украінцаў праз іх нацыянальнасць, ужыванне гвалту ў дачыненні да трох з іх і публічным ухваленні агрэсіўнай вайны Расіі супраць Украіны, піша ukranews.com.
Інцыдэнт адбыўся 18 ліпеня 2026 года пасля 21:00 на мясцовай школьнай пляцоўцы. Там знаходзіліся шасцёра дзяцей з Украіны ва ўзросце 13—14 гадоў і Караліна О. са сваімі дзвюма дочкамі.
Паводле польскіх СМІ, жанчына спачатку абражала дзяцей, а потым пачала біць хлопца і дзвюх дзяўчынак. Сам напад зафіксавалі камеры відэаназірання. Маці адной з пацярпелых расказала, што жанчына ўдарыла яе дачку кулаком у твар.
Перш чым пачаць біць дзяцей, нападніца патрабавала ад іх размаўляць паміж сабой па-польску.
Акрамя абразаў і гвалту на глебе нацыянальнасці, Караліне О. інкрымінуюць парушэнне цялеснай недатыкальнасці і публічнае ўхваленне агрэсіўнай вайны, якую вядзе Расійская Федэрацыя.
У якасці абцяжарвальных абставін следства вызначыла ксенафобскія матывы і тое, што пацярпелым не споўнілася 15 гадоў.
На першым допыце Караліна О. прызнала, што ўдарыла адну з дзяўчынак адкрытай далонню, а хлопца, паводле яе слоў, толькі адштурхнула. Пазней яна перастала прызнаваць віну і адмовілася даваць тлумачэнні.
Жанчыне пагражае да пяці гадоў пазбаўлення волі.
Каментары