Цярэшчанка: Невядомыя фізічна пашкодзілі тармазы і падушкі бяспекі ў маім аўтамабілі
Аднак кандыдат адмовіўся даць «Нашай Ніве» кантакты кіроўцаў ці сэрвіснага цэнтра, у якім праводзілася дыягностыка.
Віктар Цярэшчанка, кандыдат у прэзідэнты Рэспублікі Беларусь, заявіў, што невядомыя сур’ёзна пашкодзілі яго аўтамабіль.Паводле словаў кандыдата, пашкоджанні тармазной сістэмы і сістэмы спрацоўвання падушак бяспекі маглі мець самыя дрэнныя наступствы.
Вось што Віктар Цярэшчанка распавёў «Нашай Ніве»: «Я папрасіў сваю давераную асобу Аляксея замяніць аліву ў аўтамабілі, якім звычайна карыстаюся («Додж Караван» 2008 года выпуску). Перад заменай алівы аўто, як заўжды, праверылі сістэмай камп’ютарнай дыягностыкі. Выявіліся пашкоджанні сістэмы блакавання тармазоў і падушак бяспекі. Аказалася, пашкоджанні былі механічныя, зробленыя з прымяненнем грубай фізічнай сілы».
Віктар Цярэшчанка звязвае гэты выпадак з увагай спецслужбаў да сваёй асобы:
«Прыкладна месяц таму гэта пачалося. За маімі перамяшчэннямі сочаць, тэлефоны праслухоўваюць, скайп заблакавалі. Даходзіць да анекдатычных выпадкаў, калі ў халоднае надвор’е адзін ітой-жа чалавек прагульваецца пад маімі вокнамі з дзіцячай каляскай цягам васьмі гадзін запар».
Адначасовае пашкоджанне тармазоў і падушак бяспекі можа стаць прычынай аварыі з трагічнымі наступствамі.
Віктар Цярэшчанка вырашыў узмацніць кантроль за асабістымі кіроўцамі. «У мяне іх два. І я сёння ж іх звольню. Не магу больш давяраць гэтым людзям. За апошнія дні машыну ўскрывалі двойчы. Пасярод белага дня. З салона нічога не знікла, аднак цяпер зразумела, што працавалі не простыя зладзеі», — кажа кандыдат.
Сп. Цярэшчанка адмовіўся даць «Нашай Ніве» кантакты кіроўцаў, каб атрымаць удакладненні аб характары пашкоджанняў, ці сэрвіснага цэнтра, у якім праводзілася дыягностыка. Кандыдат у прэзідэнты спаслаўся на неабходнасць правядзення службовага расследавання справы.
Цяпер чытаюць
Хто з беларусаў трапіў на прыём да прэзідэнта Польшчы ШМАТ ФОТА40
Каментары